Namzetên Rêxistina Partiya Çepên Kesk a Amedê di çarçoveya xebatên hilbijartinê de gund bi gund geriyan. Namzet, rastî eleqeyeke mezin a gel hatin. Namzetan diyar kir ku dê di 14’ê Gulanê de bi hev re dawî li îktîdara AKP-MHP’ê bînin.
Rêxistina Partiya Çepên Kesk a Semsûrê bi boneya Cejna Remezanê tevî namzetên parlamenteriyê çû serdana mexdûrên erdhejê yên li konbajaran û gundan dijîn.
- ÎHD’ê bertek nîşanî êrişa polîsan a li dijî Dayikên Şemiyê da û wiha got: “Em ê li hemberî bêhiqûqtiyên we serî netewînin. Dê li windakiriyên xwe bigerin, aqûbeta wan bipirsin û heta kujerên wan tên darizandin jî dê têkoşîna xwe bidomînin.”
Înîsiyatîfa Azadî ji bo Girtiyên Nexweş xwest ku girtiyê nexweş Abdulvahap Kavak were berdan ku bi meha ye nabin kontrolê.
Di çalakiya Rûniştina F a li Stenbolê de nameya girtiya nexweş Guneş Tekîn hate xwendin. Tekîn wiha got: “Bikaranîna dermanan êdî taqet di min de nehişt.”
Şaredarê Bazarcixê yê AKP’î Îbrahîm Yilmazcan çû serdana konbajarê li navçeyê ku ji ber bagerê xisareke mezin gihiştibûyê. Mexdûrên erdhejê jî bi gotina “Hûn li ku bûn?” bertek nîşan dan û Yilmazcan jî wiha bersiv da: “Wê demê di bin kon de nemîne.”
Xizmên Windakiyan û şaxên ÎHD’ê yên Amed û Êlihê di çalakiya vê hefteyê de, di şexsê helbestvan Tanîle Varujan de aqûbeta hemû qurbaniyên Qirkirina Ermenan pirsîn.
Li Newala Hespistê ya li çoltara Hezexê liv û tevgereke hewayî ya zêde heye.
Li Qilebanê rewdegurek kete gova bizinan û 30 bizin mirar kir.
Tevî biryara “binpêkirinê” ya AYM’ê jî dorpêça polîsan a li ser Qada Galatasarayê nehat rakirin. Dayikên Şemiyê xwestin li qadê daxuyaniyê bidin lê ji hêla polîsan ve hatin astengkirin û 17 kes hatin binçavkirin.
Malbata Şenyaşar di roja 761’an a Nobeta Edaletê de li ser hesaba xwe ya medyaya civakî ev peyam parve kir: “Divê em bikevin rêyeke ku em tevek bi hev re dimeşin. Bila ew rê jî bibe rêya edaletê. Dema dil di heman rêyê de dimeşin dibin yek.”
Hejmara kesên di erdhejên Mereşê de jiyana xwe ji dest dayîn derket 50 hezar û 783’yan.
Xebatên lêgerîn-rizgarkirinê yên ji bo 3 ciwanên ketine Çemê Munzurê û winda bûn di roja 2’yan de berdewam in.
Siyasetmedarê kurd Nasir Yagiz bertek nîşanî êrişên li Herêma Federe ya Kurdistanê li dijî welatparêzên kurd tên kirin da û wiha got: “Neparastina kurdan a li Kurdistanê cihê rûreşiyê ye. Bi van êrişan dixwazin kurdên welatparêz tune bikin.”
Her sal bi hatina biharê re Geliyê Botanê û Qesra Elo Dîno bi xeml û xêra xwe dibe wargeha bi hezaran geştyaran. Îsal jî bi hatina biharê re kulîlk bişkivîn û Geliyê Botanê xweşiktirîn dîmenan pêşkeşî ziyaretvanan dike.