Înîsiyatîfa ji Girtiyên Nexweş re Azad got mafê tedawiya girtiyê nexweş Abdulvahap Kavak hatiye astengkirin û ÎHD’a Stenbolê jî diyar kir ku jiyana girtiyê nexweş Abdulkadîr Kuday di xetereyê de ye.
Malbatên Windakiriyan û ÎHD’ê li Amed û Êlihê faîlên Mehmet Siddik Oncu yê beriya 30 salan piştî hatibû binçavkirin hate qetilkirin pirsîn. ÎHD’a Îzmîrê jî xwest ku faîlên Alî Ûygûr ê piştî hate binçavkirin hate qetilkirin bên dîtin.
Cenazeyê endama YJA-Starê Behiye Kaçar a di şerekî li Gabarê de jiyana xwe ji dest dabû, li Sêrtê hat veşartin.
Serokê Odeya Bijîşkan a Amedê yê berê Îlhan Dîken di salvegera 9’emîn de li ser gora xwe hat bibîranîn.
Komxebata "Di Sed Saliya Peymana Lozanê de Kurd Pêkvejiyanê li Rojhilata Navîn Dikin Çareserî" li Silêmaniyê tê lidarxistin. Kesên di panelê de komxebatê de axivîn diyar kirin ku Lozan berhema xweperestî û nebûna yekitiya kurdan bû.
Li navçeya Miksê di navbera şivanên 8 gundan de gengeşî derket. Paşê şivanan li hev xist û di bûyerê de herî kêm 7 kes birîndar bûn.
Dayikên Şemiyê û parlamenterên Partiya Çepên Kesk çûn Qada Galatasarayê. Polîsan dîsa êriş bir ser Dayikên Şemiyê û parêzvanên mirovan û 17 kes kirin binçavan. Hevseroka HDP'ê Pervîn Bûldan destnîşan kir ku ew ê dest ji Qada Galatasarayê bernedin.
Malbata Şenyaşar a Nobeta xwe ya Edaletê didomîne ev peyam parve kir: “Tevî her tiştî jî em ê baweriya xwe ya bi edaletê winda nekin. Helbet ev dewran dê rojekê vegere.”
Li Enqereyê têkildarî teqîna fabrîkaya roketan û teqemeniyê ku 5 karkeran têde jiyana xwe ji dest dabû, 3 kes hatin girtin.
Polîsan duh bi şev bi ser Nûnertiya HDP’a Şîşliyê de girtin.
Denîz Poyraz di salvegera 2’yemîn a qetilkirina xwe de hate bibîranîn. Seroka Giştî ya EMEP’ê Selma Gurkan a di bîranînê de axivî, wiha got: “Bila soza me li Denîzê be, heta ku em welatekî azad ava bikin wê têkoşîna me bidome.”
Leşkeran di saetên serê sibê de li gundên Feraşîn, Wargundik û Melîxa bi ser gelek malan de girtin û 7 kes binçav kirin.
Hevserokê PYD’ê Salih Muslim diyar kir ku Tirkiye ji bo temamkirina plana xwe yê têkbirinê cardin dest bi êrişan kiriye û qada hewayî ji balafirên şer re vebûye û got: “Em ê heta bi hetayê li ber xwe bidin, em pişta xwe didin berxwedana gelê xwe."
Aktîvîsta jin Helene Erîn, diyar kir ku li dijî tecrîda li ser Rêberê PKK’ê Abdullah Ocalan nikare bêdeng bê mayîn û anî ziman ku li dijî tecrîdê ew ê bi hemû beşên Ewropayê re bibin yek.
Li Girtîgeha Kirikkaleyê girtiyan li dijî zext û binpêkirinên mafan ên li girtîgehê dest bi greva birçîbûnê kirin.