Piştî ku qedexeya weşanê ya li ser hilbijartinên dîrokî hatin rakirin, hejmartina dengan dest pê kir. Dengên Erdogan di her kêliyê de dikevin û serok û nûnerên partiyan banga “Sindoqan neterikînin” dikin.
Şaredarê AKP’yî yê Adenîzê Mehmet Mustafa Gultak li gel parêzvanên xwe bi çekan li ser sindoqan digere. Namzetê Partiya Çepên Kesk Alî Bozan bertek nîşan da û xwest girtek bê girtin.
Li gundê Yarbaşiyê yê navçeya Sergolan a Semsûrê pusûleyên bê mohr dane gundiyan.
Li navçeyên Stenbolê gelek nelirêtiyên di dema dengdanê de hatin tomarkirin.
CHP’ê dîmenên dema li navçeya Heranê ji bo Erdogan deng bi komî û bi vekirî tên dayîn parve kir.
Sercerdevan Şehmûs Babat û zarokên xwe li Sêgirkê peywirdarên sindoqan ên Partiya Çepên Kesk derb kirin û Serokê AKP’a Nisêbînê Latîf Ozel jî tevî parastvanên xwe yên çekdar zext li peywirdarên sindoqan kir.
AKP’iyan li Edeneyê êrişî peywirdarên sindoqan û muşahidên kirin ku li dijî bêusuliyan îtîraz kirin.
Li Cizîrê gef li gundiyan hat xwarin ku dengê xwe bidin AKP’ê, li Qilebanê jî destûr ji heyeta navneteweyî re nehat dayîn ku bikeve dibistanê, ji cerdevanan re wêneyên dengê wan hat xwestin û walî hemû muşahid ji Lîseya Şirnexê derxistin derve.
Muşahidên Partiya Çepên Kesk û CHP’ê ku li Kaniya Xezalan û Kolikê li dijî dengên blok derketin hatin derbkirin.
Li Amedê nêzî 200 kesî ji ber wek endamên desteya sindoqan hatin nîşandan rayên xwe nedan.
Dengdayîna di hilbijartinên serokkomarî û yên giştî de didome. Li Amed û Dêrsimê welatiyên astengdar li gel refeqatvanên xwe çûn dibistanan û bi nîşaneyên serkeftinê çûn ser sindoqan.
Dayik û bavê Denîz Poyraz dengên xwe dan û gotin: “Îro roja hesabpirsînê ye.”
Cerdevanê ku li navçeya Giyadînê bi tifingê ketî dibistanê, li ser îtîraza peywirdarên Partiya Çepên Kesk ji hate derxistin.
YSK têkildarî serlêdana Partiya Çepên Kesk a muşahîdan bersiv da û got: “Girteka encamên sindoqan dê bidin hemû muşahîdan.”
Welatiya bi navê Nefîat Aydemîr a 58 salî ku xwendin û nivîsandina wê tune ye, li Amedê tevî ku serlêdan nekiribû jî hat îdiakirin ku peywirdara sindoqê ye û nehiştin Aydemîr dengê xwe bide.