Malbata Rêberê PKK’ê Abdullah Ocalan û malbatên girtiyên din ji bo hevdîtina li Girava Îmraliyê serî li Serdozgeriya Komarê ya Bursayê û Midûriyeta Girtîgeha Îmraliyê dan.
Ji bo Parlamenterê TÎP’ê yê Hatayê Can Atalay li Dadgeha Destûra Bingehîn (AYM) cara duyemîn serlêdan hate kirin.
Di encama serdegirtinên malan ên li navçeyên Xîzan û Tetwanê yên Bedlîsê û Wanê de 43 kes hatibûn binçavkirin. Ji binçavkiriyan 22 jê hatin girtin û 12 jî hatin berdan.
Greva birçîbûnê ya dorveger ku bi daxwaza “Ji Abdullah Ocalan re azadî, ji bo pirsgirêka kurd çareserî” li girtîgehan hatiye destpêkirin di roja 5’an de berdewam dike.
Piştî biryara betalkirinê ya Dadgeha Bilind, doza Selçûk Mizrakli jinûve hate lidarxistin. Di dozê de li ser îfadeyên şahidekê din ku li dadgehê lê nehatiye guhdarîkirin, cezayê hefsê li Mizrakli hate birîn. Parêzera Mizrakli, Zulal Erdogan diyar kir ku meqamên darazê li gorî rêgezên herî biçûk ên hiqûqê jî tevnagerin û wiha got: “Ji ber nasnameya polîtîk a Mizrakli ev ceza hate birîn.”
Teqwîma hilbijartinên rêveberiyên herêmî ku dê di 31’ê adarê de bên lidarxistin di Rojnameya Fermî de hate weşandin.
Tê payîn ku di budçeya Wezareta Dadê de 12 girtîgehên nû dê bên vekirin. Nûnerên ÎHD’ê û ÇHD’ê diyar kirin ku bi girtîgehên nû yên tecrîdê kûrtir bikin re dixwazin civak were hefskirin.
Girtiyê nexweş Îsmail Tanboga ku 29 roj in li nexweşxaneyê ye, nikare xwarinê bixwe û biçe destşoyê. Bavê Tanboga, Abdullah Tanboga got ku rewşa kurê wî giran e û xwest bê berdan.
Înfaza girtiya nexweş Hatîce Çakmak a 30 sal in girtiye û di Girtîgeha Jinan a Alanyayê de ye, bi hinceta cezayên hucreyê yên berê hatibûn birîn, hat şewitandin. Dayika wê Cahîde Çakmak banga hevgirtinê ya ji bo li girtiyên kir.
Qeyûmê Şaredariya Yenîşehîrê ku ev 5 sal in erzaq nekiriye, beriya hilbijartinê 2 caran, bi giştî bi 9 milyon TL'yî miqarne û xurek kirîn.
Danişîna rojnameger Dîcle Mûftûoglû, Sedat Yilmaz û Abdurrahman Gok dê di nava mehê de bên lidarxistin. Rêxistinên pîşeyî yên rojnamegeran diyar kirin ku ew li gel hevrêyên xwe ne û banga hevgirtinê kirin.
Qadên moxilkirin û hûrkirina komirê yên gundê Avgamasiyayê ku 2 sal berê biryara hatibû dayîn bên betalkirin, zirarê didin candarên herêmê û xwezaya wê. Gundiyan bertek nîşan dan ku çima biryara hatiye dayîn nayê pêkanîn û gotin:" Fêkiyên me, heywanên me, bax û baxçeyên me û malên me di bin toza komirê de ne."
Di Çemê Dîcleyê de hema bêje her roj bûyerên nû yên xeniqandinê û xwekuştinê çêdibin. Noqavên ku beriya niha demildest mudexileyî bûyerên bi vî rengî dikirin qeyûm ew ji kar avêtin. Noqavên heyî û yên ji derve tên sewqkirin jî qels in.
Di ketina navçeya Nisêbînê de polîsan wesayîtek sekinandin û yek jê jin 2 rêwî derb kirin û binçav kirin.