Çalakiya Nobeta Edaletê ya Malbata Şenyaşar didome. Malbatê li ser medyaya dijîtal ev peyam da: “Em ê dev ji lêgerîna edaletê bernedin. Edaleta derengmayî, zilm e. Bes bibin şirîkê vê zilmê.”
Doza Komkujiya Liceyê, ji ber mirina leşkerê bersûc betal bû. HDP’ê têkildarî mijarê daxuyanî da û wiha got: “Ev doz ji bo rewakirina sûcên li dijî kurdan hatiye betalkirin.”
Tifaqa Kurd a Azadî û Demokrasiyê têkildarî qetilkirina Hevseroka Kantona Qamişloyê Yusra Derwêş, cigira wê Leyman Şiwêş û ajokarê wesayîtê Firat Tuma daxuyaniyek nivîskî belav kir û got: “Divê hemû gelê kurd li dijî êrişan piştgiriya Rojava bike û NY û YE jî helwestê nîşan bidin.”
Çawişê pispor Alpay Aras ku di pevçûnên li herêmên Zap, Avaşîn û Metînayê de birîndar bûbû, li nexweşxaneyê mir.
Danişîna doza nûçegihanên Vice News Jacop Philip John Gingell Hanrahan û Philip John Pendlebury tên darizandin bi sedema ku wergera îfadeyên wan ji aliyê Wezareta Dadê ve nehatiye şandin, hat taloqkirin.
Parêzerên Buroya Hiqûqê ya Sedsalê ji bo hevdîtina bi miwekîlê xwe Rêberê PKK’ê Abdullah Ocalan re ku 2 salan zêdetire tu agahî jê nayên girtin, dîsa serî li Serdozgeriya Komarê ya Bursayê û Midûriyeta Girtîgeha Îmraliyê dan.
Nexweşxaneya Perwerde û Lêkolînê ya Gazî Yaşargîl a Amedê derheqê girtiyê nexweş Mehmet Emîn Ozkan de rapor amade kir û ev hişyarî da: “Li ser jiyana wî xetere heye. Nikare bi tena serê xwe bijî û divê înfaza wî were taloqkirin.”
Hate diyarkirin ku girtiyên siyasî yên li Girtîgeha Tîpa F a Hejmara 1’an a Kiriklarê ji bo binpêkirinên mafan şermezar bikin qawişa li bloka B’yê 2 caran şewitandine.
Dadgeha Destûra Bingehîn ji bo 9 partiyên siyasî venêrîna darayî kir û biryar da ku derheqê berpirsên Partiya Tevgera Komunist a Tirkiyeyê de serlêdana sûc were kirin.
Hevserokê MED TUHAD-FED’ê Zekî Baran, diyar kir ku ji bo civak ji nav krîzan derkeve divê azadiya fîzîkî ya Abdullah Ocalan bê pêkanîn û anî ziman ku divê civaka ku hêza wê heye tecrîdê bişikîne bikeve nava liv û tevgerê.
Hevserokê MAF-DAD'ê Mahmût Şakar destnîşan kir ku tecrîd pirsgirêkeke bingehîn e û divê her kes di warê çareserkirinê de gavina bavêje û got ku divê hêzên demokrasiyê yên li Tirkiyeyê û yên li Ewropayê bibin parçeyeke çareseriyê.
Yusra Derwêş, Leyman Şiwêş û Firat Tuma ku di êrişa SÎHA'yê ya Tirkiyeyê de hatibûn qetilkirin, li Goristana Şehîd Îsmaîl hatin veşartin.
Şadiye Manap ku roja hatibû berdan car din hatibû girtin, piştî 30 salan ji girtîgehê derket. Hevalên wê û xizmên wê, ew bi tilîliyan pêşwazî kirin.
Danişîna doza 100 jinî ku ji ber tevlî çalakiya 1'ê Îlonê bûbûn tên darizandin, hat taloqkirin. Beriya danişînê jinan daxuyanî dan û bal kişandin ser têkoşînê.