Danişîna doza 100 jinî ku ji ber tevlî çalakiya 1'ê Îlonê bûbûn tên darizandin, hat taloqkirin. Beriya danişînê jinan daxuyanî dan û bal kişandin ser têkoşînê.
Parlamenterê Partiya Çepên Kesk Cengîz Çîçek têkildarî êrişên li dijî kurdî û hewldanên bêerkkirina dersên hilbijartî yên kurdî xwest Meclis lêkolînê bike.
Rêxistinên navend û navçeyan ên DBP’ê, Partiya Çepên Kesk û HDP’ê qetilkirina Hevseroka Qantona Qamişloyê Yûsra Derwêş û cîgira wê Leyman Şiwêş şermezar kir.
Di danişîna doza derbarê Şadiya Manap a roja hatibû berdan ji nû ve hatibû girtin de biryara beraetê hate dayîn.
Li navçeya Rezanê bekçiyê bi navê Mehmet Kan bi sîlehê êrişî pismamên xwe yê bekçî Kadrî Kan û Hayrî Kan ên birayê hev kir û her du kes jî hatin kuştin.
Komîsyona Hiqûqê û Mafên Mirovan a HDP’ê têkildarî endamê Meclisa xwe Seyîthan Kirmizi ku ji ber pêkanîna hejmartina ser piyan qebûl nekir hate derbkirin ev daxuyanî da: “Îşkenceyê bi dawî bikin.”
Wezîrê Parastinê Yaşar Guler têkildarî hevdîtina di navbera Barzanî û Erdogan axivî û wiha got: “Têkoşîna me ya li dijî terorê dê bi heman awayî bidome. Hevdîtina duh dê bi xwe re encamên erênî bîne.”
Girtiyên siyasî yên li Girtîgeha Kiriklarê diyar kirin ku girtiyên nexweş terkî mirinê hatine kirin, çalakiyên sporê tên astengkirin, cezayên disiplînê yên keyfî li wan tên birîn û wiha gotin: “Ji ber ku dayikekê peyva ‘bijî’ bi kar anî, 3 meh cezayê qedexeya hevdîtinê hate dayîn.”
Malbata Şenyaşar a têkoşîna xwe ya edaletê didomîne ev peyam parve kir: “Wezîrê Edaletê hate guherîn lê bêedaletî didome.”
Li Colemêrgê çalakî û xwepêşandan ji bo 15 rojan hatin qedexekirin. Walîtiyê, di biryara xwe ya qedexeyê de Kovîd-19 weke hincet nîşan da.
Di roja 135’emîn a erdheja li Antakyayê de di xebatên rakirina kavilan de cenazeyê jinekê hate dîtin.
Di doza Mehmet Uytun de ku di raya giştî de weke “zarokê di hembêza dayika xwe de hatiye kuştin” tê zanîn, biryar hatibû dayîn ku leşkerê bersûc li Dadgeha Cezayên Giran were darizandin. Li dijî vê biryarê îtîraz hatibû kirin û ev îtîraz hate qebûlkirin. Çawişê pispor dê bi sedema “Ji ber texsîrê bûye sedema mirinê” were darizandin.
Dayika Mazlûm Dag ku li dijî binpêkirinên mafan ên li Girtîgeha Hewlêrê 35 roj in di çalakiya greva birçîbûnê ya bêdem û bêdorveger de ye, Kûdret Dag wiha got: “Hûn nikarin bi zextê serî li zarokên me bidin tewandin.”
Ekolojîst Serwer Qeredaxî diyar kir ku ji ber êrişên çekên kîmyewî yên Tirkiyeyê li ser Herêma Kurdistanê hevsengiya ekolojiyê xera bûye û anî ziman ku birîna daran û êrişên li ser herêmê her deverê dişewitîne û herêmê ber bi çolbûnê ve dibe.
Dayikên Şemiyê ku çalakiyên wan ên li Qada Galatasarayê tên astengkirin, dê serî li Sekreteriya Giştî ya AYM'ê bidin.