Serokê MHP’a Amedê Cîhan Kayaalp ji ber sûcên “tacîza zayendî”, “îstîsmara zayendî” û “Bêparhiştina ji azadiyê ya şexsî” dihat darizandin û biryara beraetê hatibû dayîn. Dadgeha Îstînafê jî ev biryara beraetê erê kir.
Dadgeha Îstînafê ya Erziromê cezayê hefsê yê 16 sal û 3 mehan ku ji ber êrişa îstîsmara zayendî ya li dijî zarokekê li S.S. hatibû birîn xera kir û xwest rapora tenduristiya hişê faîl bê amadekirin.
Danişîna doza Parlamentera Partiya Çepên Kesk a Erziromê Meral Daniş Beştaş hate taloqkirin.
Hevberdevkê Partiya Çepên Kesk Îbrahîm Akin bertek nîşanî tecrîda li ser Rêberê PKK’ê Abdullah Ocalan da û wiha got: “Heke hûn bixwazin rewşeke wekhev û azadîxwaz ava bikin, divê hûn ji ewil vê polîtîkaya xwe ya tecrîdê bi dawî bikin.”
Wezareta Karên Derve ya Tirkiyeyê ragihand ku têkiliyên dîplomatîk ên di navbera Misir û Tirkiyeyê de derketine wê astê ku li welatên hev balyozan tayîn bikin.
Li 10 gundên Xîzanê qedexeya derketina derve û operasyona leşkerî didome. Hat ragihandin ku seranserî şevê çolterên gundan hatine bombebarankirin.
Malbatên qurbaniyên Qetlîama Pirsûsê serdana Malbata Şenyaşar kirin û peyama “Em ê têkoşîna ji bo lêgerîna edaletê berdewam bikin” dan.
Mehmet Çat ku hem şahid û hem jî mexdûrê sepanên îşkenceyên dermirovî yên Girtîgeha Hejmar 5 a Amedê bû, wefat kir.
Parêzerên Buroya Hiqûqê ya Sedsalê ji bo hevdîtina bi miwekîlê xwe Rêberê PKK’ê Abdullah Ocalan re ku 2 salan zêdetire tu agahî jê nayên girtin, dîsa serî li Serdozgeriya Komarê ya Bursayê û Midûriyeta Girtîgeha Îmraliyê dan.
Rojnamevan Kadîr Bayram li Amedê di serdegirtina mala xwe de hat binçavkirin.
Li Fransayê bûyerên ku piştî kuştina zarokekî 17 salî ya bi destê polîsan dest pê kir, di roja 8'emîn de dewam kirin.
Veysî Aydin, birayê Serokê HEP'ê yê Amedê Vedat Aydin, bilêv kir ku heya mejiyê dewletê neguhere, dosyeya Vedat Aydin û yên mîna wî dê neyên ronîkirin û got ku heta meseleya kurd bi awayekî demokratîk neyê çareserkirin, dê ev feraset neguhere.
Ji bo qewimînên di Komkujiya Madimakê de bên ragihandin, Navenda Bîrê ya Otêla Madimakê hat avakirin. Di çarçoveya projeyê de dê heya dawiya salê welatş karibin sûdê ji pirtûkxaneya dîjîtal, muzeya sanal, xebatên belgefîlm û devkî bigirin.
Endamê Meclisa Şaredariya Îdirê Mûsa Etercî anî ziman ku bajar 3 sal in ji aliyê qeyûm ve bi rant û talanê tê birêvebirin û got ku qeyûm ê hemû îhaleyan dide AKP'iyan, di 3 salan de 450 milyon lîre deyn xistiye stuyê şaredariyê.
Tevî hemû êrişan jî vegera êzidiyan a ji bo Şengalê berdewam dike. Tê gotin ku heta niha 15 hezar malbat vegeriyane Şengalê. Endamê Desteya Rêveberiya Xweser a Şengalê Dexîl Îbrahim diyar kir ku hêza êzidiyan a ji nû ve avakirinê heye.