Di encama êrişên dawî yên Îsraîlê yên li dijî Xezeyê de 132 kes hatin kuştin. Hat ragihandin ku hejmara filistîniyên di êrişên ji 7’ê cotmehê heta niha hatin qetilkirin derket 24 hezar û 100 kesan.
Siyasetmedara kurd Gultan Kişanak di Doza Kobanê de parastina xwe kir û wiha got: “Hûn li pey digerin ku propagandaya reş a rejîma otorîter a AKP-MHP’ê rewa nîşan bidin. Hûn kî ne ku dê min bidarizînin?”
Girtiyê nexweş Emîn Guler ku ji sedî 94 astengdar e û li Girtîgeha Hejmar 2 ya bi Tîpa T a Rihayê dihat ragirtin, sewqî Girtîgeha Tîpa L a Erzînganê hat kirin.
Hevserokên DEM Partiyê yên Wanê Gonul Ûzûnay û Veysî Dîlekçî destnîşan kirin wan bi hilbijartina gel endamên xwe diyar kirine û anîn ziman ku ew ê di 31’ê adarê de jî bersiveke dîrokî bidin desthilatê.
Seroka EMEP’ê ya Stenbolê Sema Barbaros ji ber biryara “îfadegirtinê” ji bo îfadeyê birin qereqolê.
Dayika yek ji kedkarên Çapemeniya Azad Kalo ku tevî gefên kuştinê, zext û êrişan jî tu caran paşvegav neavêt, Mevlûde Yakut diyar kir ku kurê wê kesekî bi doz û gelê xwe re dilsoz bû.
Dewleta tirk di nava 48 saetan de 56 herêmên Bakur û Rojhilatê Sûriyeyê bombebaran kir.
Delegeyên li Sêrt û Êlihê tev li pêşhilbijartinê bûn diyar kirin ku wan bi demokrasiyê bersiva qeyûman daye. Ji delegeyan Mete Basmaci anî ziman ku paradîgmaya Abdullah Ocalan îro li hemû bajaran ketiye pratîkê.
Di şewata li Sûltanbeyliyê de 3 karkeran jiyana xwe ji dest dan.
Ji rojnameger Silêman Ehmed ku ji hêla asayîşa PDK’ê ve hatiye revandin, 83 roj in tu agahî nayên girtin.
Çalakiya greva birçîbûnê ku girtiyên siyasî bi daxwaza “Ji Abdullah Ocalan re azadî, ji bo pirsgirêka kurd çareserî” dane destpêkirin di roja 50’yan de didome.
Delegeyên DEM Partiyê yên ji bo diyarkirina namzetan li Silopiyayê çûn ser sindoqan, diyar kirin ku dê ji bo şandina qeyûman di 31'ê Adarê de biçin ser sindoqan.
Hevseroka Komeleya Rojnamegeran a Dîcle Firatê (DFG) Dîcle Mûftûoglû ku nêzî 9 meh in girtî ye, dê di 18'ê Çileyê de cara duyemîn derkeve pêşberî dadger. Parêzerê wê Resûl Temûr, da zanîn ku di îdianameyê de xebatên rojnamegeriyê tên manîpulekirin û got: "Ya ku li vir tê darizandin xebatên rojnamegeriya qanûnî bi xwe ye."
Li Wanê namzetên di pêşhilbijartinan de ji bo hevşaredariya bajarê mezin a Wanê herî zêde deng wergirtin bûn Neslîhan Şedal û Abdûllah Zeydan.