NAVENDA NÛÇEYAN - Li çar welatên başûrê rojhilatê Asyayê Endonezya, Tayland, Malezya û Srî Lankayê ji ber lehî û hezazan herî kêm 620 kesan jiyana xwe ji dest dan. 

 

Li çar welatên başûrê rojhilatê Asyayê Endonezya, Tayland, Malezya û Srî Lankayê ji ber barînên zêde lehî rabûn û hezaz çêbûn. Li gorî daneyên rayedarên xwecihî yên çar welatan; herî kêm 626 kesan di lehî û hezazan de jiyana xwe ji dest dane û bi sedan kes jî winda ne. Fikar hene ku hejmara qurbaniyan zêde bibe.

 

ENDONEZYA 

 

Herî zêde li Endonezyayê mirovan jiyana xwe ji dest dan. Hate ragihandin ku 300 kes mirine. Tenê li Girava Sumatrayê zêdetirî 270 kes winda ne. Li Sumatra Bakur jî 166 kes, li Acehê 47 kes, li Sumatra Rojava 90 kesan jiyana xwe ji dest dan. Li hin herêman av bi qasî 3 metreyî bilind bû. Hate ragihandin ku kapasîteya morgan tijî bûye û qemyonên sarkirinê ketine dewrê.

 

TAYLAND 

 

Li herêmên başûr ên li Taylandê jî ji ber lehiyê 162 kesan jiyana xwe ji dest dan. Serokwezîr Anutin Charnvirakul serdana navendeke stargehê ya li herêmê kir û ji ber rewşa welatî tê de ne, ji wan lêborîn xwest. Her wiha anî ziman ku karê paqijkirinê dibe ku 2 hefteyan dewam bike. Hikûmetê diyar kir ku ji bo malbatên kesên jiyana xwe ji dest dan wê 62 hezar dolar tazmînat bê dayin.

 

MALEZYA

 

Li eyaleta Perlisê ya li bakurê Malezyayê jî 2 kesan ji ber lehiyê jiyana xwe ji dest dan.

 

SRÎ LANKA 

 

Bagera Ditwahê ku baran zêde kir, li Srî Lankayê bû sedema hilweşîneke mezin. Li welêt 159 kesan jiyana xwe ji dest dan, 190 kes winda ne û 900 hezar kes ji bo herêmên bi ewle hatin veguhestin. Hikûmetê rewşa lezgîn ragihand û banga alîkariya navneteweyî kir.