MÊRDÎN - Şîna Bahaddîn Ay ku di sala 1995’an de li Zagrosê jiyana xwe ji dest dabû, bi girseyî hate ziyaretkirin.
Ji bo Bahaddîn Ay (Qadîr) ku di sala 1995’an de li Çiyayên Zagrosê yên Herêma Federe ya Kurdistanê di pevçûnekê de jiyana xwe ji dest dabû û navê wî nû hate aşkerakirin, li Taxa Firatê ya navçeya Nisêbînê ya Mêrdînê şîn hate danîn. Şîn, ji hêla malbata Ay û Komeleya Alîkarî, Piştevanî, Çand û Yekitiyê ya bi Malbatên Xizmên Xwe li Dergûşa Şaristaniyê Windakirin re (MEBYA-DER) ve hate danîn. Şîn, bi girseyî hate ziyaretkirin. Girseya ku li nêzî cihê şînê kom bû, bi dirûşma “Şehîd namirin” ber bi cihê şînê ve meş li dar xist.
Wekîlên Partiya Wekhevî û Demokrasiyê ya Gelan (DEM Partî) Kamûran Tanhan û Saliha Aydenîz jî tev li meşê bûn. Girse, ji hêla xizmên Ay û rêveberên MEBYA-DER’ê ve hate pêşwazîkirin. Piştî rêzgirtinê, Hevserokê MEBYA-DER’ê Salih Kuday axivî û got ku dê xwedî li bîranîna kesên jiyana xwe ji dest dane derkevin. Kuday, got: “Tevahiya destkeftiyên me yên îro, encama bedelên wan dane ye. Em ê têkoşîna xwe mezin bikin.” Wekîl Kamûran Tanhan jî diya kir ku ew ê xwedî li bîranîna kesên di têkoşîna azadî û demokrasiyê de jiyana xwe ji dest dane derkevin û soza têkoşînê da.
Herî dawî jî birayê Ay û Hevşaredarê Nisêbînê Selahattîn Ay li ser navê malbatê axivî. Ay, diyar kir ku ew ê xwedî li Banga Aştî û Civaka Demokratîk a Rêberê Gelê Kurd Abdullah Ocalan derkevin û spasiya kesên hatine serdana şînê kir.
Sibe dê mewlûd were dayin û şîn dê bi dawî bibe.