NAVENDA NÛÇEYAN - Di çarçoveya kampanyaya “Ez dixwazim bi Ocalan re hevdîtinê bikim” de heta niha li Bakur û Rojhilatê Sûriyeyê zêdetirî 800 kesayetan îmze dane.
Di 20’ê Tebaxê de li Sûriyeyê kampanyaya “Ez dixwazim bi Ocalan re hevdîtinê bikim” hate destpêkirin. Bi sedan pêşengên civakê, siyasetmedar, hiqûqnas, akademîsyen, bijîşk, rewşenbîr, serokên eşîr û êlan, çalakvan û oldarên li Herêma Bakur û Rojhilatê Sûriyeyê û herêmên din ên Sûriyeyê (Laziqiyê, Tertûs, Siwêda, Hums, Heleb û Şam) tevl li kampanyayê bûn û daxwaza xwe ya hevdîtina bi Rêberê Gelê Kurd Abdullah Ocalan re anîn ziman.
Li gorî agahiyên ku Berdevkê Înîsiyatîfa Azadiya Rêber Abdullah Ocalan a Sûriyeyê Ferzende Munzur dane ANHA’yê; di navbera 21-30’ê Tebaxê de zêdetirî 800 îmze hatine tomarkirin. Ferzende Munzur, da zanîn ku dê Înîsiyatîfa Azadiya Rêber Abdullah Ocalan a Sûriyeyê û Înîsiyatîfa Parêzeran a Sûriyeyê der barê kampanyayê di 1’ê Îlonê de daxuyaniyê bidin.
Kampanyaya “Ez dixwazim bi Ocalan re hevdîtinê bikim”, ji aliyê Înîsiyatîfa Azadiya Rêber Abdullah Ocalan a Sûriyeyê û Înîsiyatîfa Parêzeran a Sûriyeyê ya ji bo Parastina Rêber Abdullah Ocalan ve tê birêxistinkirin.