ENQERE - Hevberdevka Komîsyona Zarokan a DEM Partiyê Berîtan Guneş Altin nîqaşên li ser "zarokên ku ber bi sûc ve têne teşwîqkirin" nirxand û destnîşan kir ku ji dêleva hebskirinê divê li ser bingeha ku dibe sedemên sûc bê sekinandin.
Mattia Ahmet Minguzzi, di 24’ê Tîrmehê de li Kadikoyyê tevî hevalên xwe dema çû marketê ji aliyê zarokên hemsalên xwe ve hate kêrkirin. Minguzzi yê ku bi giranî birîndar bû di 9’ê Sibatê de li nexweşxaneyê jiyana xwe ji dest da.
Piştî mirina Minguzzi, hinek kesan têkildarî zêdekirina cezayê “zarokên ku teşwîqê sûc hatine kirin” nîqaş kirin.
94 rêxistinên saziyên sivîl bi bangeke hevpar li dijî vê rewşê derketin. Di bangê de hate destnîşankirin ku girankirina cezayên zarokan dê rêjeya sûc kêm neke û rê li ber dubarebûna sûc nagirin. Herwiha di bangê de diyarkirin ku "aîdiyeta dibistanê, hawîrdorek civakî ya ewle, xizmetên civakî yên bi wesf, wekheviya zayendî û saziyên dost ji bo zarokan roleke girîng di kêmbûna sûckirina zarokan de dilîzin."
‘NÛKIRINA PERGALA EDALETÊ PÊWÎST E’
Hevberdevka Komîsyona Zarokan a Partiya Wekhevî û Demokrasiyê ya Gelan (DEM Partî) Berîtan Guneş Altin, nîqaşên li ser vê mijarê nirxand û destnîşan kir ku desthilat ji bo zarokan xebatan nake. Berîtan Guneş Altin, ji dêleva hebskirinê divê li ser bingeha ku dibe sedemên sûc bê sekinandin.
Berîtan Guneş Altinê, bal kişand ser daxuyaniyên rayedarên desthilatê yên piştî kuştina Minguzzi û ev tişt got: “Daxuyaniya hemû rayadarên dewletê dide nîşan ku desthilat, bêtir li rê û rêbazên hebskirina zarokan digere û ji bo vê amedekariyan dike.”
Berîtan Guneş Altan, diyar kir ku rêbaza girtinê dibe sedema paşguhkirina pirsgirêkên ku zarok pê re rû bi rû dimînin û wiha pê de çû: "Divê pergala edaleta zarokan di guhertinên radîkal de derbas bibe. Bi beşdarbûna rêxistinên civaka sivîl, baroyan û akademiyên ku di warê zarokan de dixebitin, divê pergal bi nêzîkatiyek mafparêz, veguherîner û parastinê were avakirin. Gava yekem a vê yekê divê dev ji hewldanên vekirina girtîgehên nû berdin û navendên perwerdehiyê ji bo zarokan ava bikin. Divê girtîgeh veguherînin navendên perwerdehiyê yên ku dê ji bo civakê xizmet bikin."