Li Rihayê welatî di warê mafê tenduristiyê de bi pirsgirêkan re rû bi rû ne. Hevserokê SES'a Rihayê Salih Karataş diyar kir ku gef li tenduristiya mirovan tê xwarin û got ku nexweş 3-4 mehan li malên xwe li benda dora xwe disekinin.
Berdevka Komîsyona Girtîgehan a OHD’a Rihayê Ayşe Şehrîban Demîrel tekildarî serdana wan a girtîgehan axivî û bal kişand ser pirsgirêkên girtiyên nexweş û got: "Girtiyên nexweş tevî ku bi mirinê re rûbirû mane jî nayên berdan û mafên wan ê tedawiyê jî tê astengkirin. Girtiyên nexweş bi mirinê re rûbirû hatine hiştin.”
Endamê Meclisa Partiyê ya HDP'ê Dogan Erbaş ku 12 sal ceza lê hatibû birîn û hatibû erêkirin, hat binçavkirin.
Hevşaredarên HDP'î yên Panosê Muşerref Geçer û Emrah Kiliç hatin girtin.
Baroya Îdirê, daxuyand ku li Girtîgeha Îdirê ya Tîpa S'yê gardiyanan li girtiyan xistiye û gef li parêzaran xwariye.
Li Efrînê komên girêdayî Tirkiyeyê jina kurd Ûfe Şêx Ehmedê kuştin û agir bi mala wê xistin.
Di doza êrişa li dijî cemxaneyên li Enqereyê de parêzeran xwest bersûc bên girtin lê dadgehê daxwaza wan red kir.
Parêzera EHB’î Gulhan Kaya ku du rojan di bin çavan de bû, bi îdiaya “endamtiya rêxistinê” hate girtin.
Li navçeya Elkê di serdegirtinên malan de endamên HDP'ê di nav de 12 kes hatin binçavkirin.
Balafireke bêmirov a bombebarkirî ya Tirkiyeyê êriş bir ser motorsîkleteke li ser rêya Kobanê-Helebê.
Rêxistinên mafên mirovan têkildarî "12’ê Hezîranê Roja Têkoşîna li Dijî Karkeriya Zarokan a C”hanê" daxuyanî dan û xwestin li dijî xebitandina zarokan divê plana çalakiya lezgîn bê kirin.
Hevşaredarê Bajarê Mezin ê Amedê Selçûk Mizrakli jinûve hat darizandin lê nehat berdan. Mizrakli, di danişînê de wiha got: “Me serî netewand û dê netewînin.”
Malbata Şenyaşar a têkoşîna xwe ya edaletê bênavber didomîne, di roja 812’emîn a Nobeta xwe ya Edaletê de ev peyam parve kir: “Heta ku edalet neyê em ê li mala xwe nerûnin.”
Bavê M. Kolakan yê li navçeya Farqînê polîsan di bin çavan de tundî lê kir, Mahfûz Kolakan diyar kir ku ji bo beriya niha giliyê polîsên ku tundî li zarokê wî kirin, kir gef lê hatiye xwarin û anî ziman ku ji ber îfadeya xwe paş ve nekişandiye careke din tundî li kurê wî hate kirin.