Hewldana 78’an têkildarî komkujiyên Mereş, Roboskê û di girtîgehan de pêk hatin daxuyanî da û wiha got: “Em ê komkujiyên meha kanûnê ji bîr nekin, nedin jibîrkirin.”
Polîsê bi navê Serdar Gok bi kûçikan êrişî hevjînên hev Şeyhmûs û Menîce Yilmaz kiribû û birîndar kiribû. Polîs Gok di doza derbarê wî de hatiye vekirin de beraet kir.
Koordînasyona Şopandin û Çavdêriyê ya Grevên Birçîbûnê rapora xwe ya têkildarî grevên birçîbûnê yên li girtîgehan eşkere kir û wiha got: “Divê îktîdara siyasî hêj mirin çênebûn bi rêyên aştiyane tevdîrên pêwîst bigire û ji bo nirxandina daxwazan bikeve nava tevgerê.”
Li gorî nûçeya ANF’ê hate diyarkirin ku herêmên Zap û Metînayê bi teqemeniyên qedexekirî 53 caran hatin bombekirin.
Dadgehê bi îdiaya “propagandaya rêxistinê’ 2 sal 4 meh û 3 roj cezayê hefsê li rojnamevan Siddik Guler birîbû. Piştî ku Dadgeha Bilind ev ceza pejirand Guler hate girtin.
Lijneya Rêveberiya Navendî ya DEM Partiyê bi rojeva hilbijartina herêmî kom bû.
Ji ber barîna berfê ya li herêma Serhedê li Wan, Bedlîs, Erdexan, Mûş, Qers, Îdir û Erziromê rêya bi sedan gund û mezrayan hate girtin. Li hin navçeyên Agirî û Îdirê jî dibistan hatin girtin.
Girtiyên jin ên li Girtîgeha Tarsûsê peyamek bi raya giştî re parve kirin û wiha gotin: “Kesên ku ev bêhiqûqî afirandin çawa ku her cih veguherandibin tecîda li Îmraliyê, em jî dê her qadê veguherînin qada berxwedanê ya li Îmraliyê.”
Cîhat Bakir ku li Girtîgeha Tîpa L a Panosê tê ragirtin, di nameya xwe ya ji parlamentera DEM Partiyê Meral Daniş Beştaşê şand re diyar kir ku du rayedarên girtîgehê ji bo ku tayînî girtîgeheke din bibin paketeke ku agahiyên taybet ên aydê wan û telefonek di nav de ji qawişa ku girtiyên PKK'î lê tên ragirtin daye avêtin.
Komîsyona Hiqûq û Mafên Mirovan a DEM Partiyê da zanîn ku di 11 mehên sala 2023’yan de zarok û gelek rêveberên partiyê jî di nav de 2 hezar û 906 partiyî hatin binçavkirin û 319 kes jî hatin girtin.
Hevjînê Dayika Taybet a li navçeya Silopiyayê piştî ji aliyê polîsan ve hate qetilkirin û cenazeyê 7 rojan li kolanê hate sekinandin, Halît Înan, diyar kir ku hovîtiya hatiye kirin ji bîr nakin û got: “Zarokên gelê kurd dê serbikevin.”
Hilbijartina encûmanên parêzgehan ên Iraqê ku 10 sal piştre tê kirin, dest pê kir. Çavê kurdan jî li hilbijartinên Kerkûkê ye.
Cenazeyên 282 kesan li Kîlyosê di bin peyarêyê de hatibûn veşartin û ev 6 sal in cenazeyên gelek ji wan radestî malbatên wan nehatine kirin. Malbata Leyla Kaya ku cenazeyê wê 4 sal piştre hate dayîn diyar kir ku dê “îşkenceya” li wan hatiye kirin ji bîr nekin.
Ji rojnameger Silêman Ehmed ku ji hêla asayîşa PDK’ê ve hatiye binçavkirin, 55 roj in tu agahî nayên girtin.
Çalakiya greva birçîbûnê ku girtiyên siyasî bi daxwaza “Ji Abdullah Ocalan re azadî, ji bo pirsgirêka kurd çareserî” dane destpêkirin di roja 22’yan de didome.