MÊRSÎN - Endamê Odeya Bazarvanên Mêrsînê Huseyîn Ozmen bal kişand ser krîza aborî û got: "Li Herêma Bazarê ya 4'an nêzî 175 esnaf hene. Heta niha nêzî 75 esnafî dezgehên xwe girtine."
Yek ji sektora ku herî zêde krîza aborî tesîrê lê dike jî sektora bazarkirinê ye. Esnafên Herêma Bazara 4'an a Mêrsînê, ji ber krîza aborî dezgehên xwe venakin. Endamê Odeya Bazarvanên Mêrsînê Hasan Ozmen, anî ziman ku nêzî hezar û 370 endamên wan hene, lê belê ji ber krîza aborî gelek jê dezgehên xwe venakin.
‘75 ESNAFÎ DEZGE VENEKIRIN'
Ozmen, destnîşan kir ku fiyet duqatî biha bûne û got: "Hema bêje eznafên li bazarê kincan difiroşin hemû bêyî serfetihê jî bikin diçin malê. Êdî mirovên tên bazarê tenê li beran dinihêrin û diçin. Êdî kes nikare tiştekî bikire. Berê karê esnafên fêkî û zebze difirotin pir baş bû. Ev esnaf berê bi tona zebze û fêkî dianîn. Lê niha ancax 300 kîloyî tînin. Bi zor û heft bela berên tînin difiroşin. Niha li Herêma Bazarê ya 4'an nêzî 175 esnafî hene. Lê niha ji ber nebûna kar tenê 100 esnafî dezgeh vekirine, nêzî 75 esnaf jî dezge venekirine. Gelek jê ji ber kar nabe nayên."
‘SEDEMA KRÎZÊ NEHILBERÎN E'
Esnaf Yilmaz Kolûman jî, bilêv kir ku krîza aborî herî kêm welat 50 sal bi paş ve biriye. Kolûman, diyar kir ku sedema vê yekê jî nebûna hilberînê ye. Kolûman, anî ziman ku piraniya beran îthal in û di 4 salên dawî de karê wan ji sedî 50 kêm bûye. Kolûman got: "Va hûn dibînin, bazara vikî vala ye. Esnaf perîşan bûne. Kes ji fiyetan ne razî ye. Berê mişteriyên me bi 100 lîreyî hemû pêdiviyên li bazarê dikirî. Heta carinan pere jî ji ber dima. Lê niha bi 100 lîreyî ancax ji sedî 60 pêdiviyên xwe dikare bikire." Kolûman anî ziman ku ger wisa dewam bike ew ê top bavêjin.
‘REWŞ XIRAB E'
Esnaf Hasan Dargin jî, got: "Rewş xirab e. Divê demildest ev rewş bê çareserkirin. Dibêjin krîz tune ye, lê bila werin nav gel, bila bên bazarê. Hela krîz heye yan tune ye? Krîz heye û em bi krîzê dizanin."
MA/Ergîn Çaglar