Ji ber erdheja pileya wê 5.9 a li navenda bajarê Xoy a Îranê rû da, li 4 gundên navçeya Elbak a Wanê zirarek mezin çêbû. Şaredariyên HDP'ê alîkarî kom kirin û şandin 4 gundên Elbakê. Lê esker û polîsan maşînê alîkariyê rawestandin û destûr neda alîkarî bê şandin. Li aliyê din şandeyeke ji rêveber û endamên Partiya Demokratîk a Gelan (HDP), Kongreya Civaka Demokratîk (KCD), Kongreya Demokratîk a Gelan (HDK) û Partiya Herêmên Demokratîk (DBP) pêk tê, li Qereqol Leşkerî ya Albayrakê hat rawestandin. Leşker û polîs, destûrê nadin ku 4 qemyonên zexîrê, paçê zarokan û branda têde hene, derbas bibin. Welatiyan bertek nîşanî astengiya polîs û eskeran dan.

 

'KA YEK MILLET YEK WELAT' 

 

Welatî Murat Kaya, anî ziman ku miroavên xaniyên wan xera bûn, ji sermayê perîşan bûne û wiha got: "Ger ku alîkarî neyê kirin em nikarin li vir bijîn. Em ji bo xwe û sewalên xwe starekê dixwazin. Kes destê alîkariyê dirêj nakin. Yên destê alîkariyê dirêj dikin jî asteng dikin. Li vir bi hezaran sewal mirar bûn. Xaniyên me xera bûn. Em alîkariyê dixwazin. Kani her dem dibêjin 'Yek millet yek vatan' Gerku wisa be çima pirsgirêkan çareser nakin? HDP’ê çi ji we kiriye. Hûn çima destûr nadin HDP alîkariyê bişîne?" 

 

‘BI TASEK ŞORBE EV PIRSGIRÊK ÇARESER NABE'

 

Welatî Mahmut Kaya jî anî ziman ku heta niha bi qasî tê xwestin alîkariya çadiran ji wan re nehatiye kirin û wiha got: “Hûn çima alîkariya ji mere tê şandin asteng dikin? Pêdiviya gel bi alîkariyê heye. Em naxwazin sewalên me yên din jî mirar bibin. Ger ku hûn alîkarî nakin bihêlin bila yên din alîkarî bikin. Ev tişt bi tasek şorbe çareser nabe." 

 

‘ASTENGÎ NE WÎCDANÎ Û SINCÎ YE'

 

Welatiyekî Gundê Xanîkê jî anî ziman ku astengiya li pêş alîkariyê ne sincî û ne wîcdanî ye û wiha got: "Mirovên li van gundan mexdûr bûne bi alîkariyê dikarin li ser piyan bin. Duh AKP hat vir. Bila her kes bê. Lê bila kes alîkariya yê din jî asteng neke."