GIRÊ SPÎ - Yek ji jinên şerker ên li dijî hêzên Tirkiyê û paramîlîter ên dibin kontrola wê de, di rêzên herî pêş de parastinê dikin Arîn Kobanê, bal kişand ser şerê bi rêve dibin û got: “Me bi tilîliyan bi wan re şer kir. Ew vî awayê me yê şer dizanin. Em jin axa xwe diparêzin.”
Êrîşên Tirkiyeyê û hêzên paramîlîter ên dibin kontrola wê de yên li dijî Bakur û Rojhilatê Sûriyeyê di roja 9’an de dewam dike. Jinên ku ji bo parastina axa xwe di ceperên herî pêş de şer dikin, diyar kirin ku ewê li ber xwe bidin. Cengawerên jin ên li ser xeta sînor û li bajaran şer dikin, li çeperên Girê Spî li dijî hêzên paramîlîter ên navê xwe kirin “Artêja Netewî ya Sûriye” (ANS) têkoşînek mezin didin.
BI TILÎLIYAN DIÇIN ÇEPERAN
Yekîneyên Parastina Jin (YPJ) ên li ser xeta Ebû Sira û Çelebî di parastinê de ne, rê nadin hêzên paramîlîter. Şervana jin Arîn Kobanê ku bi tilîliyan diçe çeperên parastinê, diyar kir ku li ser xeta Girê Spî li dijî wan êrîş hene û wiha axivî: “Em li dijî tank, top û balafirên wan ên şer li ber xwe didin. Emê baweriya gelan vale dernexin. Emê hevalên xwe yên di parastina axa xwe de jiyana xwe ji dest dane jî jibîr nekin. Ji bo ku çete nekarin bikevin ser ax, cih û warên jiyana me, emê şer bikin. Duh li gelek cihan em ceribandin. Lê me bersiv da wan. Em tanka wan îmha kir. Gelek kuştî û birîndarên wan hene. Me bi tilîliyan bi wan re şer kir. Ew vî awayê me yê şer dizanin. Em jin axa xwe diparêzin. Ev ax axa şehîdên me ye.”
‘YÊN MAFDAR EMIN’
Viyan Rojava jî da zanîn ku ew di vî şerê xwe de mafdarin û wiha got: “Dixwazin axa me dagir bikin. Emê têkoşîna hevalên xwe yên şehîd bi rêve bibin. Bila dijminê me vê yekê baş zanibe; emê rê nedin dagirkeriyê. Em ê wan ji gund û qadên ew ketine, bavêjin.”
MA / Nazim Daştan