RIHA – Li Pirsûsa Rihayê di 14'ê Hezîrana 2018'an de xizm û parêzvarên Parlementerê AKP'ê yê Rihayê Îbrahîm Halîl Yildiz, Hecî Esvet Şenyaşar û du kurên wî kuştibûn. Di lêpirsîna hat destpêkirin de tenê ji malbata Şenyaşara Fadil Şenyaşar hat girtin. Parêzerê dosyeyê Hîdayet Enmek, got: "Tê xwestin komkujiyê bidin jibîrkirin."
Di 14'ê Hezîrana 2018'an de li Pirsûs a Rihayê xizm û parêzvarên Parlementerê AKP'ê yê Rihayê Îbrahîm Halîl Yildiz, Hecî Esvet Şenyaşar û kurê wî Adil û Celal Şenyaşar kuştibûn. Lê belê hîn jî di lêpirsîna hatiye destpêkirin de tu tişt rû nedane. Di bûyerê de birayê Yildiz Mehmet Alî Yildiz jî miribû û ji malbata Şenyaşar Mehmet û Ferît Şenyaşar jî di nav de 8 kes birîndar bibûn. Di ser bûyerê re salek derbas bûn lê di dosyeyê de tenê ji malbata Şenyaşar Fadil şenyaşar girtiye.
Parêzerê malbata Şenyaşar, Hîdayet Enmek rewşa lêpirsîna heyî nirxand. Parêzer Enmek, bilêv kir ku ev êrîş wijdanê civakê êşandiye û der barê kesên li ber çavan bav û du kur kuştin de di warê hiqûqî de tiştek nehatiye kirin û di dosyeya bûyerê de tu pêşveçûyîn rû nedaye.
‘DIXWAZIN BIDIN JIBÎRKIRIN'
Enmek, bilêv kir ku der barê dosyeyê de biryara nepeniyê heye, lê belê hin rayedarên payebilind ên dewletê bi hin vîdeoyan ev yek bin pê kiriye û got: "Em parêzer, me got biryara nepeniyê hatiye binpêkirin û em dixwazin xwe bigihînin delîlan. Lê belê daxwazên me giş hatin redkirin. Ji ber heta niha biryara nepeniyê didome, em nikarin tu agahiyî bi dest bixin. Me hevdîtin bi dozgerê dosyeyê re çêkirin. Di hevdîtinan de ji me re hat gotin lêpirsîn didome, gumanbar tên tespîtkitin. Lê ev me qaneh nakin. Ev bûyer li ber çavan qewimî û her kes bi bersûc û gumanbarên vê cinayetê dizane. Hîn jî netespîtkirina van kesan tê wateya dosye bi awayekî baş nayê birêvebirin. Fadil Şenyaşar ku bavê wî û du birayên wî hatin kuştin salek e girtiye. Der barê kuştina bav û du kuran de kesek jî nehatiye girtin. Ev jî nîşan dide ku lêprisîneke çalak tune ye. Dixwazin vê komkujiyê bidin jibîrkirin." Enmek, anî ziman ku Mehmet Şenyaşar ku di bûyerê de birîndar bibû kesên ku tespîtkirine ji dozger re gotiye û li dozgeriyê teşhîs kiriye û got: "Di vî warî de tespît hatine kirin. Piştî van tespîtan kes nehat binçavkirin û ev yek di çapemeniyê de jî derneket. Lêpirsîneke em jê nebawer tê birêvebirin. Diviya di dema bûyerê de ev kes bihatana girtin. Lê belê salek derbas bûye tu pêşketin tune ne û ev jî li cem me dibe cihê şik û gumana."
'WIJDANÊ CIVAKÊ ÊŞAND'
Enmek, got: "Em parêzer, em ê dev ji vê dosyeyê bernedin. Ji bo êrîşkar hesab bidin em tev digerin. Eger edalet pêk bê wê wijdanê civakê yê êşiyaye rihet bibe."