RIHA - Yasîn Arslan, ku der barê birayê xwe Metîn Arslan de got "Her kêlî, her deqeyek ku wî xerc kir, hem ji bo me û hem jî ji bo pêşdebirina têkoşînê bû" û xwişka wî Rabîa Arslanê jî ji bo birayê xwe wiha got: "Em careke din bi birayê xwe serbilind bûn."
HPG'ê di 11'ê Tebaxê de ragihand ku Metîn Arslan (Koçero Urfa), endamê Komîteya Navendî ya PKK'ê û Fermandarê Akademiyên Apollo, di 4'ê Mijdara 2019'an de di êrişeke hewayî de jiyana xwe ji dest daye. Malbat û hezkiriyên Arslan di 12'ê Tebaxê de li taxa Amara ya Xelfetî merasîmeke sersaxiyê ji bo wî li dar xistin. Şîn di roja sêyemîn de berdewam dike.
Metîn Arslan ku di Adara 1968'an de li navçeya Belqis a Dîlokê ji dayik bû, zarokê duyemîn ê malbateke xizan a heft xwişk û bira bû. Dê û bavê wî bi eslê xwe ji Xelfetiyê ne, lê ji bo xebatê çûne wir. Aslan ji bo alîkariya bavê xwe yê şelwar difirotin û malbata xwe bike, hema bêje çi kar hebûya dikir. Piştî ku dibistana seretayî, navîn û amadeyî li navçeyê qedand, Arslan hem di civaka xwe de û hem jî di tevahiya jiyana xwe ya akademîk de bi serkeftina xwe, bi dîsîplîn û xebata xwe bû kesekî berbiçav.
Arslan li Zanîngeha 9 Eylulê ya Îzmîrê Beşa Aborî û Darayî qezenc kir û ji bo xwendinê çû wir. Her havîn vedigeriya bajarê xwe û wekî nanpêj dixebitî û pereyê xwe yê xwendinê qezenc dikir û ji hêla aborî ve debara malbata xwe dikir. Di van salan de, dema ku malbata wî ji aliyê aborî ve zehmetî dikişand, ew diçû Edeneyê da ku pembû berhev bike û lêçûnên xwendina xwe bi dest bixe. Wê sala ku çû Edeneyê birayê wî yê biçûk, Ercan, ku 15 salî bû, di qenalekê de xeniqî. Bavê wî ku debara xwe bi firotina şelwaran dikir, ji ber ku pereyên wî kêm bûn, neçar ma ku cenazeyê wî bi traktorê bibe Belqisê. Vê bûyerê Metîn Arslan ku wê demê xwendekarê pola sêyemîn a zanîngehê bû, pir êşand. Bi rastî, piştî merasîma cenazeyê birayê xwe, Arslan cara dawî vegeriya cem malbata xwe ya li Belqisê û nêzî salekê şûnde, biryar da ku tevlî PKK'ê bibe.
JI RÊBERÊ GELÊ KURD PIR BANDOR BÛ
Arslan ku di salên zanîngehê de beşdarî xebatên Komalên Ciwan bû, di vê demê de bi çend hevalên xwe re tevlî PKK'ê bû. Modela herî girîng a Arslan kurê xalê wî, Rêberê Gelê Kurd Abdullah Ocalan bû. Çûna Abdullah Ocalan ji Xelfetiyê û têkoşîna ku wî da destpêkirin û bi rê ve bir, di nav tiştên ku herî zêde bandor li Arslan kir de bûn, ku dixwest wî nas bike. Arslan ku tevlî PKK'ê bû, navê ku bavê wî di nav gel de pê dihat nasîn, Koçero, li xwe kir. Celal Arslan ku bi salan hesreta kurê xwe Metîn dikişand, di sala 2005'an de ji ber nexweşiya şekir jiyana xwe ji dest da.
Ji bo Metin Arslan ku di 4'ê Mijdara 2019'an de di êrişa Tirkiyê de jiyana xwe ji dest da, di 12'ê Tebaxê de li taxa Amara ya Xelfetiyê şîn hat danîn. Ferdên malbata Asrlan der barê wî de axivîn.
Birayê wî, Yasîn Arslan diyar kir ku Metîn Arslan bi şêwaza jiyana xwe û helwesta xwe mirovekî hêja bû ku were naskirin. Aslan ku got "Ji ciwaniya xwe ve, di nava têkoşînê de her tim bi vê têgehê pêwendî bi me re danî. Kiryar û pirsên wî her tim perspektîfên nû li me zêde kirin. Wî her tim xwe ji bo kirina tiştekî cuda di vê têkoşînê de veqetand" wiha domand: "Em bi hêvî li benda wî bûn, lê me xebera şehadeta wî wergirt. Her kêliyek jiyana wî hem ji bo me hem jî ji bo pêşdebirina têkoşînê bû."
Yasîn Arslan birayê xwe yê mezin Metîn Arslan wekî "kesekî ku pir xwende, her tim bi awayekî cuda û pêşverû difikirî" wesifand. Arslan diyar kir ku Rêberê Gelê Kurd Abdullah Ocalan yek ji wan kesan bû ku herî zêde bandor li ser ramana wî kiriye. Arslan anî ziman ku wî jiyana Abdullah Ocalan wekî mînak girtiye û ramanên wî bi awayekî pir baş bi kar aniye û ev yek bûye sedem ku birayê wî di temenekî ciwan de tevli nava tevgerê bibe.
Rabîa Arslanê (54) jî diyar kir ku birayê wê yê mezin Arslan dema ku ew hîn ciwan bûye tevlî PKK'ê bûye û got: "Em bi hev re diçûn gund. Wî fistiq berhev dikir. Birayê min baş, wêrek, cesaret û bihêz bû. Bi rûmet jiya. Heya niha kesî ji bo wî negotiye xirab e. Em bi birayê min serbilind in."
MA / Ceylan Şahînlî