Meclisa Dayikên Aştiyê têkildarî êrişên dewleta tirk û komên wê yên paramîlîter ên li dijî Bakur û Rojhilatê Sûriyeyê û Helebê li gelek bajaran daxuyanî dan û êriş protesto kirin. 

 

AMED

 

Meclisa Dayikên Aştiyê ya Amedê têkildarî êrişan li avahiya komeleyê ya Amedê daxuyanî da. Berdevka Meclisa Jinan a Partiya Wekhevî û Demokrasiyê ya Gelan (DEM) Halîde Turkoglu, hevserokên DEM Partiyê yên Amedê, Hevserokên Partiya Herêmên Demokratîk (DBP) ya Amedê, Tevgera Jinên Azad (TJA), Komeleya Piştevaniya Malbatên Girtiyan (TUAY-DER), Federasyona Komeleyên Hevgirtina Hiqûqî ya Malbatên Girtî û Hikûmxwaran re (MED TUHAD-FED) beşdar bûn. Di daxuyaniyê de pankarta “Bi Ruhê Kobanê em ê Rojava biparêzin” hate hilgirtin. 

 

Dayika Aştiyê Raîfe Ozbey diyar kir ku komên çete li Bakur û Rojhilatê Sûriyeyê jin, zarok û kalan koçber kirin, sivîlan qetil dikin û dîl digirin. Raîfe Ozbey, wiha domand: “Em şer naxwazin. Bila dev ji vî şerî berdin. Bi tank û topan êriş dikin. Çi ji gelê Rojava dixwazin? Di vê de tu maf, hiqûq û edalet tune. Bila êdî aştî were dinyayê. Em şer qebûl nakin. Mirov tên qetilkirin. Ev nayê qebûlkirin, em qebûl nakin. Êdî bes e, bes e!”

 

Halîde Turkoglû ku pişt re mafê axaftinê girt, banga rawestandina êrişan kir.

 

Daxuyanî bi çepik û dirûşmeyan bi dawî bû.

 

ÊLIH

 

Daxuyaniya li Êlihê jî li pêşiya Navenda Kar a Nasiroglû hate dayin û nûnerên partiyên siyasî û rêxistinên civaka sivîl jî tev li bûn. Di daxuyaniyê de dovîzên “Em li dijî şer aştiyê diparêzin” û “Bijî aştî” hatin hilgirtin. Di daxuyaniyê de Dayika Aştiyê Meyaser Akdag axivî û wiha got: “Divê gelê kurd ji bo pêşîlêgirtina rijandina xwînê bibe yek. Ma qet wijdan tune ye? Çima xwîna mirovan tê rijandin, çima qetlîam tên kirin? Gel nabe yek lewma ewqas xwîn dirije. Bêdengî koletî ye. Ev koletî rê li ber komkujiyên nû vedike. Bila dayik êdî negirîn. Daxwaza me kurdan jiyaneke birûmet e û dê ji bo vê heta dawiyê li ber xwe bidin. Heke aştiyeke birûmet bixwazin, bila biçin Îmraliyê. Ji ber ku ji bo hemû gelan soza aştiyeke birûmet û jiyaneke aştiyane dide.” 

 

Daxuyanî bi dirûşmên "Bijî berxwedana Rojava", "Jin jiyan azadî" û "Em ê bi berxwedanê bi ser kevin” bi dawî bû. 

 

ŞIRNEX

 

Meclisa Dayikên Aştiyê li ber avahiya DEM Partiyê ya Silopiyayê daxuyanî da. Rêxistinên DBP û DEM Partiyê yên navçeyê piştgirî da daxuyaniyê. Di daxuyaniyê de pankarta "Rojava rûmeta me ye" hat hilgirtin û girseyê dirûşma "Bijî berxwedana Rojava" berz kir. Li ser navê Dayikên Aştiyê Asya Tay axivî û anî ziman ku dewletên dibêjin em mafê mirovan diparêzin divê li dijî êrişan rawestin û wiha got: "Heke di rastiyê de jî mafê mirovan diparêzin çima li dijî van êrişan bêdeng in. Li wir zarok tên kuştin, jin tên kuştin. Gelek kes koçber bûn e. Heke mafê mirovan diparêzin bila vî şerî temaşe nekin. Daxwaza me li wan û hemû kesan ew ê ku li dijî vî şerî bisekinin û edî şerê li ser welatê me bi dawî bibe."

 

Emîne Alkiş jî bertek nîşanî bêdengiya dewletên navneteweyî da û daxwaz kir ku herkes li dijî şer berpirsyartiya aştiyê li xwe bigire.

 

CIZÎR

 

Meclisa Dayikên Aştiyê li ber avahiya DEM Partiyê ya Cizîrê jî daxuyanî da. Rêxistinên DBP û DEM Partiyên yên navçeyê, Parlamentera DEM Partiyê ya Şirnexê Newroz Uysal Aslan û gelek kes tev li daxuyaniyê bûn. Di daxuyaniyê de Berdevka Dayikên Aştiyê Hatîce Baytûr axivî. Hatîce Baytûr bi lêv kir ku li ser gelên Rojava û Sûriyeyê êrişên dijwar hene û ev tişt anî ziman: “Rojava dilê Kurdistanê ye. Divê hemû kes li dijî van êrişan rabin ser pêyan. Em weke Dayikên Aştiyê divên edî bila şer bi dawî bibe û aştiyek pêk were."

 

Daxuyanî bi dirûşma, "Bijî aştî" bi dawî bû.

 

MÊRDÎN

 

Li Mêrdînê li pêşiya avahiya DEM Partiyê daxuyanî hate dayin û nûnerên partiyên siyasî û jinan piştgirî dan. Di daxuyaniyê de pankarta “Na ji şer û dagirkeriyan re, aştî a niha” hate hilgirtin. Dayika Aştiyê Halîme Kaya di daxuyaniyê de anî ziman ku dewlet ji rexekî ji kurdan re destê aştiyê dirêj dike û li rexa din jî êriş dike. Halîme Kaya got ku ew vê qebûl nakin û wiha got: “Divê tecrîda li Îmraliyê bê bidawîkirin û j bo aştiyê gav bên avêtin. Destê xwe ji Rojava bikişînin. Rojava bi tenê nîne. Rojava ya me ye. Çeteyên xwe ji Rojava bikişînin. Bes e êdî ji vî şerî re, bila êdî ev xwîn bisekine. Bes e ji şer re, werin em bi hev re aştiyê bînin. Pirsgirêk bi xwînê çareser nabin.” 

 

WAN

 

Meclisa Dayikên Aştiyê ya Wanê jî têkildarî êrişan li ber avahiya DBP'ê ya Wanê daxuyaniyî da. Di daxuyaniyê de pankarta "Bi ruhê Kobanê em ê Rojava biparêzin" hat vekirin. Rêxistina DBP'ê ya Wanê, Rêxistinên navend û navçeyan ên DEM Partiyê, Parlamenterên DEM Partiyê yên Wanê Gulcan Kaçmaz Sayigît, Sînan Çîftyûrek, Zulkuf Uçar û gelek welatî beşdarî daxuyaniyê bûn.

 

Endama Meclisa Dayikên Aştiyê ya Wanê Zekiya Kaya di daxuyaniyê de axivî û diyar kir ku ew êrişên dijminane û şerê li dijî Rojava qebûl nakin û wiha got: “Em bi kulîlkên spî diçin cem her kesê ku gavên aştiyê diavêje."

 

Endama Meclisa Dayikên Aştiyê ya Wanê Rabîa Algor jî diyar kir ku divê her kesên xwedî wijdan rabin ser piyan û êrişên li ser Rojava şermezar kir. Rabîa Algor, got. “Mafê wan ê vê yekê nîne. Em dizanin kî destekê dide DAIŞ’ê. Em vê yekê qebûl nakin."

 

Daxuyanî bi dirûşma “Bijî berxwedana Rojava” bi dawî bû. 

 

GEVER

 

Li navçeya Gever a Colemêrgê jî li avahiya DEM Partiyê daxuyanî hate dayin. Di daxuyaniyê de Dayika Aştiyê Gulbeyaz Mihçi axivî û wiha got: “Li dijî şer em her tim aştiyê diparêzin. Em êrişên li dijî Rojava şermezar dikin. Xelkê wê herêmê xaka tu kesekî dagir nekirine. Tenê ji bo jiyaneke birûmet û xweser têdikoşin. Lê belê hêzên bi sala ye li wir bi cih bûn şer derdixînin û xwe didin aliyekî. Li rexekî qala aştiyê dikin li rexa din jî şer sor dikin. Wiha nabe. Bingeha aştiyê li Îmraliyê ye. Gelê kurd dê bi van lîstikên qirêjî nexape. Bila her kes li dijî şer, aştiyê biparêze. Em mirin, girtin û şer naxwazin. Tekane daxwaza me, jiyaneke wekhev e.” 

 

Daxuyanî, bi dirûşmên "Bijî berxwedana Rojava" û "Jin, jiyan, azadî" bi dawî bû. 

 

AGIRÎ

 

Rêxistinên DBP û DEM Partiyê yên Agiriyê jî li pêşiya avahiya DEM Partiyê êriş protesto kirin. Hevserokê DBP’a Agiriyê Hîkmet Adiguzel got ku Bakur û Rojhilatê Sûriyeyê bi tekoşîna li dijî DAIŞ’ê re jiyaneke li ser bingeha azadîxwaziya jinê ava kiriye û wiha got: “Têkoşîna jinan ji bo hemû cîhanê bû çavkaniya hêviyê. Dixwazin bi êrişên Tirkiye û komên paramîlîter van destkeftiyan tune bikin. Bi hevkariya HTŞ û SMO ku baskên DAIŞ’ê ne hewl didin Rêveberiya Xweser tune bikin. Lê belê gelê kurd û gelên herêmê dê li dijî vê bêdeng nemînin. Ev êriş ne tenê li dijî Bakur û Rojhilatê Sûriyeyê lê ji bo hemû herêmê gef in. Yên pişta xwe dane çeteyan, teqez dê li hemberî berxwedana demokratîk a gelan têk biçin. Ji bo parastina Rojhilata Navîn a di nava aştiyê de û nirxên mirovahiyê, em banga piştevaniya bi Rojava re li her kesî dikin.” 

 

ÎZMÎR 

 

Înîsiyatîfa Dayikên Aştiyê yên Îzmîrê bi civîneke çapemeniyê li avahiya DEM Partiyê ya Îzmîrê êriş şermezar kirin. Li ser navê însiyatîfê Dayika Aştiyê Cemîle Aydin axivî. Cemîle Aydin, da zanîn ku her çend hikûmet soza aştiyê dide jî, ji tayînkirina qeyûmên li şaredariyan, binçavkirin û zext dewam dikin û got:"Ger Erdogan û Bahçelî behsa aştiyê dikin, çima operasyonên xwe didomînin? Bila ji bo berjewendiya gelê tirk û kurd dawî li vê zilmê bînin. " 

 

SÊRT 

 

Meclisa Dayikên Aştiyê ya Sêrtê jî li avahiya xwe daxuyanî dan. TJA, DBP û DEM Partiyê jî piştgirî dan. Di daxuyaniyê de dirûşmên "Bijî berxwedana Rojava", "Jin jiyan azadî" ile "Bijî aştî" hatin berzkirin. Dayika Aştiyê Maşallah Arslan di daxuyaniyê de ji bo pêşîlêgirtina rijandina xwînê banga hestiyariyê li raya giştî ya navneteweyî kir. Maşallah Arslan, wiha got: “Hiqûqa navneteweyî tê binpêkirin û şerekî qirêjî tê meşandin. Dîsa dixwazin gelên mazlum qurbanî planên qirêjî bikin. Em bi têkoşîneke hevpar dikarin pêşiya vê bigirin. Çi dikeve ser milê kê divê bike. Bes e, êdî bila xwîn nerije.” 

 

COLEMÊRG

 

Rêxistina DEM Partiyê ya Colemêrgê jî ji avahiya partiyê heta peykerî meş li dar xist. Parlamenterê DEM Partiyê yê Colemêrgê Onur Duşunmez û gelek welatî tev li meşê bûn. Di meşê de dirûşmên “Berxwedan jiyan e” û “Bijî berxwedana Rojava” hatin berzkirin. Piştî meşê daxuyanî hat dayin. 

 

Parlamenter Onur Duşunmez got ku divê hemû gelên Rojhilata Navîn ên aştiyê dixwazin bi destê hev bigirin û ev tişt anî ziman: “Bi bêdengiya li hemberî çeteyan û zîhniyeta wan a qirêjî re aştî çênabe. Yên di demên berê de li gel van çeteyan tevgeriyayin winda kirin. Lê dostên kurdan bi ser ketin. Yên dixwazin Şoreşa Rojava tune bikin divê baş bizanin ku dê Rojava heta dawiyê li ber xwe bide û tu caran nekeve.” 

 

Piştre jî metna daxuyaniyê ji hêla Hevseroka DEM Partiyê ya Colemêrgê Humeyra Armut ve hate xwendin. Daxuyanî bi dirûşman bi dawî bû.