ŞIRNEX - Mahmut ê 12 salî ku bavê wî Osman Kaplan di komkujiya Roboskî de di nava 34 kesan de hat kuştin, 6 salin diçe ser gora bavê xwe û her dem pirsa “Bavê min çima hat kuştin” ji diya xwe dipirse.
Di 28’ê Kanûna 2011’an de, li gundê Roboskî yê navçeya Qilabana Şirnexê balefirên TSK'ê bombe barandin û 19 jê zarok 34 kes kuştin.
Li gel ku 6 sal di ser komkujiyê re derbas bûn jî hêj berpirs ne hatine darizandin û êşa malbatên Roboskî kêm nebûye. Malbatên ku ji bo berpirs bên darizandin her hefte çalakiya Lêgerîna Edaletê pêk tînin 312 hefte li pey xwe hiştin. Yek ji malbatên ku her tim diçin ser gora xizmên xwe û kêlên goran paqij dikin malbata Osman Kaplan e.
HER TIM PIRSA ÇIMA BAVÊ WAN HATIYE KUŞTIN DIKIN
Hevjîna Osman Kaplan ê hatiye qetilkirin Pekîze bi 5 zarokên xwe re tenê ma. Zarokên ku yê mezin 17 û yê biçûk 12 saliye her roj dama diçin dibistanê û tên li ber goristana "Şehîdên Roboskî" re derbas dibin. Ji roja komkujiyê heta niha her 5 zarok ji dayika xwe Pakîze Kaplan pirsa 'Çima bavê me hatiye kuştin dikin' dipirsin. Yê herî zêde pirs dike jî biçûkê malê Mahmut Kaplan ê 12 salî ye.
‘6 SAL IN ÊŞA DILÊ MIN KÊM NEBÛYE’
Pakîze Kaplan da zanîn ku kurê wê Mahmut her tim pirsa bavê xwe dike Û zarokekî her tiştî di hûndirê xwe de digire û wiha got: “Ji ber ku hevjînê min pir dixwest zarokên xwe bide xwendin bazirganiya li ser sînor dikir. Ji ber kesekî bixebite di malê de tune ye xizmên me alîkariyê didin me. Ger derfetên kar hebûna hevjînê min karê bazirganiya sînor nekiribûya. 6 sal in hêjî êşa di dilê min de kêm nebûye.”
‘EM DIXWAZIN KUJER BÊN DÎTIN’
Kaplan diyar kir ku hemû zarokên wê pirsa bavê xwe dikin û wiha pêde çû: “Bi taybet Mahmut pir mereqa bavê xwe dike. Zarok hêjî wateyê nadin qetilkirina bavê xwe. Mahmut her tim diçe ser gora bavê xwe. Em jî ligel wî tên. Rewşek bi êşe. Dilê me şewitî em naxwazin yê kesek din bişewite. Em dixwazin kujer bên dîtin û darizandin. Em aştiyê dixwazin.”
‘MIN PIR BÊRIYA BAVÊ XWE KIRIYE'
Kurê Osman Mahmut Kaplan ê her hefte roja Pêncşemê di çalakiya ‘Lêgerîna Edaletê’ de cih digire û gora bavê xwe ziyaret dike diyar kir ku ew pir bêriya bavê xwe dike û got: “Bavê min her roj tê bîra min. Dema bavê min vedigeriya ji me re tişt dianîn. Min pir bêriya bavê xwe kiriye.”
MA / Gokhan Altay