Di ser Rewşa Awarte (OHAL) a piştî hewldana darbeyê ya 15’ê Tîrmehê hat îlankirin re sal û nîvek derbas bû û tê payîn ku dê heta demeke dirêj jî bidome. Berdevkê Konfederasyona Sendîkayên Kedkarên Cemaweriyê (KESK) Saît Baran bertek nîşanî pêkanînên Rewşa Awarte û KHK’yan dan û got ku wê têkoşîna wan a li dijî Rewşa Awarte bidome. 

 

Baran destnîşan kir ku îktîdarê Rewşa Awarte wek çoyekî bi kar aniye. Baran bi lêv kir ku îktîdarê gotiye wan Rewşa Awarte li hemberî kesên darbekar îlan kiriye, lê belê ev yek bi KHK’yan veguheriye firsendekê û li hemberî hemû derdorên muxalif hatiye bikaranîn. Baran got ku li cîhanê mînaka vê tişta ku wek rejîmekê tê bikaranîn tune ye. Baran anî ziman ku ew KESK bi rihetî nehatine roja îroyîn û dema ew têkoşiyane bedêlên giran dane û wê ev têkoşîna wan îro jî li hemberî hemû sepandinên derhuqûqî û neheq bidome. 

 

‘EM Ê TÊKOŞÎNEKE YEKPARE ESAS BIGIRIN’ 

 

Baran destnîşan kir ku bi Rewşa Awarte re li herêmê destûra bikaranîna mafên demokratîk jî nayê dayîn û wan bi daxuyaniyên çapemeniyê bertek nîşanî vê yekê daye, lê belê ji bo bandora bertekên wan zêdetir bibe ew ê di çarçoveya biryarên navendê de çalakiyan li dar bixin. Baran wiha got: “Em şaxên KESK’ê yên Amedê, em ê li gor biryarên navendê em ê têkoşîna xwe ya li dijî van neheqiyan bidomînin. Em ê têkoşîneke yekpare esas bigirin.” 

 

Baran bi lêv kir ku rewşa welat ne tu rewş e û ev tişt gotin: “Gelek kesên hilbijartî di girtîgehan de ne, qeyûm tayînî şaredariyan hatin kirin. Vîna gel nayê hesibandin. Kedkar di şevekê de ji kar tên avêtin. Em ê li hemberî van pêkanînan têkoşîna xwe ya demokratîk pêş ve bixin û bidomînin.” Baran kampanyaya “Ne Rewşa Awarte em demokrasiyê dixwazin” ku ji aliyê KESK, DÎSK, TMMOB û TTB’ê ve hatibû destpêkirin jî bi bîr xist û got ku xebatên wan ên di çarçoveya vê kampanyayê de jî didomin.