XARPÊT - Malbatên ji bo bi xizmên xwe yên li Girtîgeha Tîpa T a Xarpêtê re hevdîtinê pêk bîni çûn girtîgehê, rayedarên girtîgehê dîsa nehiştin malbat hevdîtinê bikin. Malbatan bi dozgerê girtîgehê re hevdîtin kirin û gotin ku heke hevdîtina din bên dîsa nehêlin ew xizmên xwe bibînin, dê çalakiya rûniştinê bidin destpêkirin.
6 girtiyên jin ên li Girtîgeha Tîpa T a Xarpêtê tên girtin, 54 roj in di çalakiya greva birçîbûnê ya bê dem û bê dorveger de ne. Ji ber binpêkirina mafan girtî nikarin bi malbatên xwe re hevdîtinê jî pêk bînin. Xizmên girtiyan ji bo hevdîtina hefteyî pêk bînin çûn girtîgehê, careke din ew negirtin hevdîtinê. Li ser navê malbatan hevjîna Hayatî Mehmetoglu Şengul Mehmetoglu daxuyanî da û aşkera kir ku di serî de nasnameyê, gelek pêkanînên keyfî li ser girtiyan ferz dikin, heke pirsgirêk dewam bikin dê li ber girtîgehê çalakiya rûniştinê bidin destpêkirin.
‘DÎSA XEYALÊN ME ŞIKANDIN’
Mehmetoglu da zanîn ku wan Komîsyona Lêkolînê ya Mafên Mirovan a Meclisê û Wezareta Edaletê re hevdîtin kiriye û wiha got: "Ji bo pirsgirêk çareser bibin me agahî da wezaretê. Ji ber ku îro jî hevdîtina vekirî bû em bi hêvî bûn û her yek me ji bajarekî hat. Lê dîsa xeyalên me şikandin. Sozên ku dabûn li ber avê çûn." Mehmetoglu bal kişand ser zextên li girtîgehê û xwest heyeteke serbixwe li girtîgehê lêkolînê pek bîne.
‘EM Ê ÇALAKIYA RÛNIŞTINÊ BIDIN DESTPÊKIRIN’
Mehmetoglu li ser KHK'a cilên yek reng fermî dike jî rawestiya û aşkera kir ku cilên yek reng li dijî rûmet û wijdana mirovahiyê ye û wiha pê de çû: "Ji xwe OHAL'a heyî her tişt ji cewhera wê derxistiye. Ev têrê nake mirovan sûcdar dikin û wan dixin bin îzolasyonê. Di serî de li Guantanamoyê, li gelek cihan cilên yek reng li ser girtiyan ferz dikin, ev hişê mirovan zincîrkirin e. Heke wiha biçe em ê li ber girtîgehê çalakiya rûniştinê bidin destpêkirin."