AMED – Siyasetmedar û ronakbîrên beşdarî civîn ango dîdariya “Kurd pêvajoyê nîqaş dikin” bûn diyar kirin ku di demek wiha awarte de ku kurd derbas dibin yekîtiya xwe ava bikin û ji bo avakirina yekîtiyê û dahatûya tifaqê daxwaz heye.
Siyasetmedar, nivîskar û bijîşkên beşdarî civîna “Kurd pêvajoyê nîqaş dikin” a li Amedê hat lidarxistin bûn der barê yekîtiya neteweyî ya kurd de nirxandinan kirin. Ji beşdarên civînê bijîşk Selçûk Mizrakli diyar kir ku li dijî barbariya li Rojhilata Navîn tê meşadin kurdan carek din li ser dika dîrokê cihê xwe girt û mîsyonek giran ketiye ser milê kurdan. Mizrakli got: “Li Rojhilta Navîn pêvajoyek şer diqewime. Di pêvajoyek wisa de mafê kurdan jî heye ku nasnameya xwe bi dest bixin û bibin xwedî statû. Ji bo avakirina neteweya kurd dê bikevin nav hewldanan û hin tesîsan ava bikin.”
‘DAXWAZA DIHATÛYÊ BI HERKESÎ RE HEYE’
Mizrakli destnîşan kir ku di civînê de ji bo yekîtiya neteweyî nêrînên nexşerêyek hatin axivîn û got: “Em di pêvajoyek bi hezaran ku siyasetmedarên kurd li Tirkiyeyê girtî ne de derbas dibin. Li hember van pêlên tunekirina krudan carek din kurdan hewl da ku bên ba hev. Carek din kurdan da nîşandan ku ew dikarin ji bo vî welatî bibin hêvî. Di vê civînê de gelek fikir û ramanên cuda nêrînên xwe anîn ziman û daxwaz ji bo dihatûyek hevpar heye. Min vê yekê dît.”
‘MESELEYA KURDSITAN WEK ORKESTRAYÊ YE, DIVÊ BÊ AKORTKIRIN’
Nivîskar û lêkolîner Veysel Çamlibel ku ji Îzmîrê beşdarî civînê bû anî ziman ku ew wek gelek welatparêz û ronakbîrên kurd li ser yekîtiya neteweyî li hev kom bûn û wiha got: “Em li ser mijarên kurd û Kurdistan axivîn û me nîqaşên berfireh kirin. Nîqaşên yekîtiya neteweyî ya kurd ne nîqaşên dê di demek kin de biqedin. Heta ku kurd yekîtiya xwe ava nekin, dostên kurdan jî çê nabin. Bi sedan sal e li her aliyên Kurdistanê gelê kurd heman tiştî daxwaz dike. Lê mixabin ev daxwaz pêk nayê. Gelê kurd daxwaza tîne ziman lê tiştek nakeve meriyete. Divê deng û daxwaza kurdan bê akortkirin û dengek xweş derbikeve. Meseleya Kurdistanê wek meseleya orkestrayê ye. Pêwîste çar dengên enstrûmanên di orkestrayê de heman deng be.”
‘TIRKIYE HEMWEXT ÊRÎŞÎ SÊ PARÇEYAN DIKE’
Nivîskar û siyasetmedar Fuat Onen jî da zanîn ku bi qasî avakirina yekîtiyê armanca yekîtiyê jî girîng e û wiha axivî: “Ji bo yekîtiya neteweyî berjewendiyên yekîtiyî girîng in. Îro em li bakur kom bûn. Ji bo dengê kurdan biçe hev civînek gelek girîng e. Tirkiye îro li ser sê parçeyên Kurdistanê şer dide meşandin. Di meseleya Kerkûkê de Tirkiye bi Iraq û Îranê re li hevkariyê kir. Tirkiye her roj axa Başûr bombebaran dike. Her wiha îro dîsa Tirkiye gefa li Rojava dixwe. Jixwe Bakurê Kurdistanê wêran kiriye. Bi hezaran mirov kuşt û bi hezaran xistiye girtîghan. Îro va em li bakur kom bûn. Li dijî van êrîşan em dikarin çi bikin divê me wê bikin.”
MA / Bîlal Guldem-Rifat Şahîn