Bi Rewşa Awarte re li girtîgehan binpêkirina mafan û zext zêde dibin. Li girtîgehan hejmar zêde ye û ji hejmara kapasîteyan zêdetir girtî dimînin. Yek ji van hejmaran jî zêdebûna zarokan e. li gorî daneyên Wezareta Edaletê ya 2017’an 2 hezar û 800 zarok di girtîgehan de ne. Zarokên temênê wan di navbera 12-18’an de ne hezar û 778 kes in û hejmara zarokên hikûmxwarî jî hezar û 22 kes in. Di nav hejmaran de zarokên li gel dayikên xwe cih nagire. Li gorî daneyên Tora Parêzerên li Qada Zarokan Dixebitin (ÇAÇAV) jî zarokên di girtîgehan de yên herî zêde temenê wan 15-16 ye. 

 

'DÊ 15 GIRTÎGEHÊN DIN JÎ ÇÊBIKIN’ 

 

Ji ÇAÇAV’ê Parêzer Hasan Erdogan der barê mijarê de diyar kir ku di salekê de hejmara zarokên bi qereqolan re tên nasîn 100-110 hezar e û di salekê de nêzî 10 hezar zarok tên girtin. Erdogan anî ziman ku hejmara zarokên girtî her ku diçe zêde dibe û gelek girtîgehên zarokan vebûn û wezaretê ragihand ku dê li tevahiya Tirkiyeyê 15 girtîgehên din jî yên zarokan bên vekirin. 

 

'DI DU SALÊN DAWÎ JI SEDÎ SED HEJMAR ZÊDE BÛYE’ 

 

Erdogan da zanîn ku di nav du salên dawî de hejmara zarokên girtî ji sedî sed zêde bûne û bandora OHAL’ê li ser vê yekê heye. Erdogan destnîşan kir ku ji sedî 85’ê zarokan bi hinceta “ “Sûcên li dijî mal” tên girtin û got: “Sedemê vê yekê jî bêkarî, xizanî û koçberiye. Gelek zarokên penaber jî girtî ne. Li gorî daneyên wezaretê 148 zarokên penaber girtî ne. Lê li gorî me ev hejmar zêdetir e. Ji ber ku hejmara zarokên bêxwedî zêde ne.” 

 

LI GIRTÎGEHÊN ZAROKAN BINPÊKIRINA MAFAN DERKET ASTA JOR 

 

Erdogan got ku li girtîgehên zarokan binpêkirina mafê mirovan derketine asta herî jor û gelek girtîgehan li zarokên girtî tundî tê kirin û rastî tacîz û îstîsmara zayendî tên. Erdogan aşkere kir ku divê girtîgehên zarokan bên girtin û dawî li girtina zarokan bê. 

 

MA / Dîren Yurtsever