WAN - Goristana Xerzanê ya ku 267 cenaze jê hatin revandin, di wêneyan de jî tê dîtin ku bi sedan gor hatine rûxandin û çihê şopa tekên kepçeyan hêj hene.
Goristana Xerzanê ya li gundê Oleka Jor a navçeya Tetwana Bedlîsê ye, 267 cenazeyên di goran de bi fermana dozgeriyê derxistin û şandin Saziya Tiba Edlî ya Stenbolê. Wêneyên goristanê derketin holê, di wêneyan de bi sedan gor hatine rûxandin û li cihê goran tenê bermahiyên rûxandinê mane.
HÊJ ŞOPÊN KEPÇEYAN LI GORISTANÊ NE
Bi sedan cenaze di dîrokên cuda de li goristanê defin kirin, hêzên dewletê avahiya pirtûkxaneya nû qediya bû û mizgefta li goristanê jî dîwarên wan bi tevahî rûxandin. Cenaze berî hefteyekê ji goran derxistine û kepçeyên ku çûne herêmê hêj şopên tekên wan li herêmê tên dîtin. Qad bi tevahî bûye deryaya heriyê, kevirên goran li herêmê belav bûne.
Bavê Dîlan Bîngol a li Goristana Xerzanê definkiribû Lezgîn Bîngol, di 21'ê Kanûnê de serî li Serdozgerê Komarê yê Bedlîsê dabû û gilî kiribû. Parêzerê Bîngol di 23'yê Kanûnê de careke din serî li dozgeriyê da û serlêdana sûc kir, ji bo "Cenaze bê îadekirin û serlêdana sûc" daxwaz name dan dozgeriyê; çend xalên girîng derketin pêş. Parêzeran di serlêdana sûc de aşkera kir ku miwekîlê wan Bîngol serî li Fermandariya Cendirmeyan a Bedlîsê daye, li gorî tespîtên li cihê bûyerê, cihê goristanê û derûdora wê hatiye texrîbkirin, qebra keça wî Dîlan Bîngol hatiye kolan û cenazeyê wê ne li cihê xwe ye. Her wiha di serlêdanê de tê gotin ku ji ber vê xebata ku bê agahî pêk hatiye, miwekîlê wan serî li dozgeriyê daye, di hevdîtinê de hatiye gotin ku 267 gor vekirine û ji van goran yek ya keça wî ye, ji bo tespîta nasnameyê bê kirin mînak şandine ATK'ê.
'EV TASARRÛFA ÎDARÎ YE AN LÊPIRSÎNA DOZGERIYÊ YE?'
Parêzeran destnîşan kir ku Bîngol di sala 2014'an de cenazeyê keça xwe definkiriye û rûxseta neqilê ji ATK'a Rihayê girtiye definkiriye û ji wê dîrokê vir ve dê cenaze bê derxistin an na, tu agahî bi wî re nehatiye parvekirin. Di serlêdana sûc de, hat pirsîn ku vekirina qebran û derxistina cenazeyan li gorî tasarûfa îdarî ya karê ATK'ê ye, an di çarçoveya lêpirsîna dozgeriyê de derxistine, divê agahî û belgeyên di vê der barê de hemû bên dayîn. Herî dawî di daxwaznameyê de tê gotin ku ji bo cenazeyê keça Bîngol bê definkirin, hemû belge hatine girtin, divê cenaze bidin malbatê. Her wiha di serlêdan sûc de hat xwestin ku kesê ev sûc kiriye divê li gorî TCK'ê bên cezakirin.
HEMAN ROJÊ BIRYARA 'KÊM AGAHIYAN' DAN
Bîngol û parêzer, piştî ev daxwazname dan dozgeriyê bi saetan ew rawestandin. Piştî demeke kêm ji mesaiyê re ma, dozger ev bersiv da daxwaznameyê: "Girtekên ku îfadeyên kesên bi fikar esas digire, raporên pêzan, belgeyên der barê rayedarê ku bi qanûnî ne hazir e, biryara kêm agahdariyê der barê wan de hatiye dayîn" bi vê bersivê daxwazname paşve hat şandin.