ŞIRNEX – Li Şirnexê doza 58 kesên ku ji aliyê qeyûm ve ji kar hatibûn avêtin û ji bo vegerin ser karên xwe vekiribûn, bi hinceta “têkiliya wan bi rêxistinê re heye” bi awayekî neyînî hatin biencamkirin. Hevseroka Şaxa Sendîkaya Genel-Îş’ê ya Şirnexê Zeynep Îdîn, destnîşan kir ku sapikaya karkerên ku daxwazên wan hatin redkirin paqij e.
Li navenda Şirnexê û navçeyên wê Cizîr û Silopiyayê nêzî 450 karker ji aliyê qeyûmên tayînî şaredariyan hatibûn kirin ji kar hatibûn avêtin. Dozên ku karkeran ji bo vegerin ser karê xwe vekiribûn yeko yeko bi awayekî neyînî tên encamkirin. Dadgeha Huqûqê ya Asliyeyê ya Şirnexê wek hincet jî diyar kir ku “têkiliya wan bi rêxistinê re heye.”
Hevseroka Şaxa Sendîkaya Genel-Îş’ê ya Şirnexê Zeynep Îdîn, têkildarî mijarê agahî dan û got ku wan heta niha ji bo 250 karkerî serî lê daye. Îdîn destnîşan kir ku dereng bersiva serlêdanan tê dayîn û doza 58 karkerên taşeronî yên li Şaredariya Şirnexê piştî sal û nîvekê şûnde biencam bûye. Îdîn got ku doza 58 karkeran bi hinceta “têkiliya wan bi rêxistinê re heye” bi awayekî neyînî biencam bûye.
‘SABIKAYA WAN PAQIJ E’
Îdîn anî ziman ku der barê karkeran de tu dosyeyeke cezayî tune ye û wiha got: “Têkildarî hinceta ku hat nîşandan de, berê der barê karkerên me de qet lêpirsîn nehatine vekirin. Karkerên me yên sabikaya wan paqij e û der barê wan de tu biryareke ku endamên rêxistinê ne tune ye.” Îdîn diyar kir ku wan van dozên hatine redkirin veguhastiye Dadgeha Îstinafê ya Dîlokê û wiha got: “Heke ji Îstinafê jî encamek bi dest nekeve em ê heta Dadgeha Qanûna Bingehîn (AYM) û Dadgeha Mafên Mirovan a Ewropayê (DMME) biçin.”