AMED - Li Mehmet Şahînê ku li navçeya Rezanê mamsotetî dikir û bi KHK’ê hat îxrackirin cezayê pereyî hat birîn. Bi hinceta di nav fealiyetên sendîkayî yên du sal berê de cih girtiye, cezayê pereyî ku dê ji meaş tuneyî qut bikin lê hat birîn. Şahîn got: “Henekê xwe bi mirovan dikin.”
Li navçeya navendî Rezanê ya Amedê li mamosteyê ku bi KHK’ê hat îxrackirin, ji ber tev li fealiyetên sendîkayî yên du sal berê bûne, cezayê pereyî yê dê ji meaş bê qutkirin hat birîn. Ev cezayê ku di dîroka Tirkiyeyê de cara ewil e tê birîn, mirovan diheyirîne. Mehmet Şahînê ku bi KHK’ya di 29’ê Cotmeha 2016’an de hat îxrackirin, di 29’ê Kanûna 2015’an de li ser biryara sendikaya ku endamê wê ye ji bo şerê li herêmê raweste tev li çalakiya ji bo rojekê rawestandina kar bû. Di ser çalakiyê re 2 sal derbas bûn, lê belê tu mueyîdeyeke cezayî çê nebû. Lê belê di meha Mijdarê de der barê Şahîn de lêpirsîn hat destpêkirin û jê hat xwestin ku parêziya xwe bike. Şahîn der barê çalakiya ku di 2015’an pêk hat de parêziya xwe da Gerînendetiya Perwerdehiya Netewî ya Navçeyê, lê belê di 12’ê Mijdarê de “cezayê pereyî yê qutkirina ji meaşê mehane” teblîxî Şahîn hat kirin.
Li gor Qanûna Karmendên Dewletê ya Jimare 657’an ev ceza tenê li kesên karmend tê birîn û bi vî awayî li Tirkiyeyê cara ewil e ku cezayekî wisa tê birîn. Bi vî cezayî re Şahîn heyirî.
‘HENEKÊN XWE DIKIN’
Mehmet Şahîn bertek nîşanî vî cezayî da û ev tişt gotin: “Li hemberî şerê li Kurdistanê ne mumkun e ku em xwe li bêdengiyê deynin. Sendîkaya me ev çalakî li dar xist û piştî du salan şûnde sûc hatiye hesibandin. Ji roja ku me çalakî li dar xistiye heta niha der barê me de tu lêpirsîn nehatibûn vekirin. Lê em îro dibînin ku lêpirsîna niha hatiye vekirin der barê wê de demildest biryar tê dayîn. Ev jî nîşan dide ku ceza berê hatiye dayîn û xwestina parêziyê jî tiştekî formalîte ye. Ji Cotmeha 2016’an ve ji peywira xwe hatime îxrackirin. Li kesekî ne karmend cezayê karmendiyê dibirin. Resmen henekê xwe bi mirovan dikin.”
‘WEK ÇÎROKA AZÎZ NESÎN E’
Şahîn anî ziman ku her cure qanûn tê binpêkirin û wiha axivî: “Li gor qanûnê der barê bûyereke ku du sal di ser re derbas bûne lêpirsîn nayê vekirin. Her wiha der barê kesekî ku ji peywirê hatibe avêtin û li gor qanûna karmendan vekirina lêpirsînê jî komediyeke ecêb e. Tiştên xwe didin der çîrokên Azîz Nesîn tînin bîra mirov. Min 22 salan mamostetî kir, gelek pêvajoyên cuda xwe dan der, lê cara ewil di vê pêvajoyê de bi sepandinên evqasî derqanûnî re rû bi rû dimînim. Kenan Evren bi xwe jî hewl dida li gor qanûnên xwe tev bigere.”