NAVENDA NÛÇEYAN-Tevgera Azadiyê daxuyaniyek da û diyar kir ku ew tu agahiyî ji Hevserokê Tevgera Azadiyê yê Silêmaniyê Azad Omer Mihemed wernagirin. Di daxuyaniyê de wiha hat gotin: “Gumanên me hene, dibe ku di van pêlên binçavkirinê yên ji aliyê asayîşê ve tên kirin de hatibe binçavkirin.”

 

Tevgera Azadiya Civaka Kurdistanê der barê Hevserokê Tevgera Azadiyê yê herêma Silêmaniyê Azad Omer Mihemed de daxuyaniyek nivîskî da û diyar kir ku îro piştî ku Azad Omer Mihemed çûye bazarê tu agahî jê nayên wergirtin.Tevgera Azadî di dewama daxuyaniya xwe de ev tişt gotin: “Em bi tevahî gelê xwe û raya giştî agahdar dikin, hevalê me Azad Omer Mihemed ku bi navê Hacî Azad, Hevserokê Tevgera Azadiyê yê herêma Silêmaniyê ye. Ji saet 09:30’ê vê sibehê ve çûye bazarê û piştî wê tu agahî jê nayên wergirtin.”

 

Tevgera Azadî têkildarî Omer Mihemed wiha got: “Gumanên me hene ku li asayişa Silêmaniyê be û ew jî di çarçoveya vê pêla girtin û binçavkirinan de hatibe binçavkirin.”

 

Herî dawî di daxuyaniya Tevgera Azadî de ev bang hate kirin: “Em asayişa Silêmanî, lijneya ewlehiyê ya Silêmanî û Walîtiya Silêmaniyê agahdar dikin, da demildest aqûbeta hevalê me diyar bikin. Eger diyar nekin, wê helwestên me yên tund hebin.”