Şaredariya Xozatê ya CHP'î, wêneyên ku Komkujiya 38'an a Dersimê vedibêjin rakirin. Wêne li Kolana Cumhûriyetê ya Taxa Yeniyê li ser dîwarekî sed metrekareyî daliqandîbûn. Rakirina wêneya bû cihê bertekên tund. Li ser dîwarê nêzî 500 wêne û zêdeyî hezar belgeyên ku komkujiya 38'an vedibêjin hatin rakirin. 

 

Ev wêne û belge di sala 2012'an de hatibûn daliqandin. Lê belê şaredariya CHP'î bi hinceta ku paqijkirina berfê asteng dike wêne û belge rakirin. 

 

Têkildarî mijarê me bi Şaredarê Xozatê Celalettîn Polatê CHP'î re hevdîtin çê kir. Polat wiha got: "Ew wêne qediya bûn. Di zivistanê de paqijkirina berfê asteng dikirin. Wêne heşifî bûn, nerihetî didan der. Her wiha kesên dixwestin wesayîtên xwe park bikin jî, ji bo wan jî asteng bûn. Em ê di biharê de orjînala wan wêneyan daliqînin." 

 

ŞAREDARÊ BERÊ: RAKIRINA WÊNEYAN TÊ WATEYA TUNEKIRINA BÎRÊ 

 

Şaredarê Xozatê yê berê Cevdet Konak ku di sala 2012'an de daliqandina wêneyan pesend kiribû ji bo wêneyên hatin rakirin ev tişt gotin: "Bi daliqandina wan wêneyan mebest ew bû ku, bê nîşandan komkujiya 38'an ne îsyan bû, komkujî û qirkirin bû. Ji bo çêkirina wî dîwarî û daliqandina wan wêneyan bi sedan ciwan bi dildariyî xebitîn. Lê ya ku niha tê kirin, bi tunekirina dîwar nixumandina ser qewimînan e. Tunekirina bîrê ye. Şaredariya Xozatê ya CHP'î li wan kulîlkên ku me li dor wî dîwarî çandibûn nenêrî û ew hişk kirin. Paşê nivîsa ku bi xwîn û hêstirên komkujiya 38'an a Dersimê hat nivîsandin jê bir. Niha jî wêne rakirin. Bila şaredariya CHP'î lêborînê ji şehîdên 38'an bixwaze." 

 

MA / Semra Turan