STENBOL - Rêxistinên çapemeniyê bertek nîşanî cezakirina rojnameger Nedîm Turfent dan û diyar kirin ku dadgehê nexwestiye bibîne ku Turfent rojnamger e û ev tişt gotin: "Bi vî cezayî dixwazin rojnamegerên li herêmê çavtirsandî bikin. Lê wê rojnameger vê yekê qebûl nekin, wê tim nûçeyan çê bikin."
Di danişîna 5'emîn a doza nûçegihanê Ajansa Nûçeyan a DÎcleyê (DÎHA) (ku bi KHK'ê hat girtin) Nedîm Turfent de ku di 13'ê Gulana 2016'an de li Wanê hat girtin, dadgehê 8 sal û 9 meh cezayê girtîgehê li Turfent birî. Rêxistinên çapemeniyê bertek nîşanî vê rewşa dadgehê dan.
EREN: DADGEHÊ NEXWEST BIBÎNE KU NEDÎM ROJNAMEGER E
Serokê Giştî yê DÎSK Basin-ÎŞ'ê Farûk Eren, anî ziman ku her kes dizane ku Nedîm rojnameger e û ji ber nûçeyên ku çê kirine hatiye darizandin û wiha got: "Biryareke diyar e." Eren, got ku biryara ku dadgehê daye ne biryareke ku dê bêra kirin û wiha domand: "Mixabin ev yek nîşaneya ku em nizanin em ê sibê bi çi re rû bi rû bimînin bixwe ye. Tişta wehîm ew e ku roja ku Nedîm ceza xwar wê rojê li Stenbolê doza Reînayê hebû. Li wir bersûcê ku got 'Ez cîhadîst im, ez ê li her derî şer bikim' hat berdan. Lê belê ji ber nûçeyên xwe rojnameger bi tawanbariya 'rêxistinê' tê tawanbarkirin û di girtîgehê de ye. Ceza lê tê birîn, belê kesê dibêje 'ez cîhadîst im û ez ê li her derî şer bikim' bi awayekî negirtî tê darizandin û berdan. Vegotina vê nakokiyê êdî pir zor e. Em bi rewşeke rezîl re rû bi rû ne. Ji bo rojnamegeran, ji bo hêzên demokratîk ev nîşaneya ku em nizanin em ê sibê bi çi re rû bi rû bimînin bi xwe ye. Ev ne meselaya ku Nedîm li Stenbolê nedihat darizandin li cihekî ji ber çavan dûr dihat darizandin ne, rojnameger, rêxistinên çapemeniyê ji nêz ve wê dozê dişopandin. Lê belê li gel vê yekê jî dadgehê nexwest bibîne ku Nedîm ne rojnameger e." Eren got ku ew hêvî dikin ku Dadgeha Bilind vê biryarê xera bike.
GUÇ: DIXWAZIN RONAMEGERAN BITEPISÎNIN
Nûnerê Şaxa Komeleya Rojnamegerên Hevdem (ÇGD) a Stenbolê Ûgûr Guç jî, anî ziman ku ev cezayê li Nedîm hatiye birîn ji bo rojnamegeriyê biryareke wehîm e. Guç, diyar kir ku biryareke ku dozger û dadwerên bi awayekî taybet hatine peywirdarkirin e û wiha got: "Tepisandina rojnamegerên ku rastiyê dinivîsin tê xwestin."
DURMUŞ: DIXWAZIN ROJNAMEGERAN ÇAVTIRSANDÎ BIKIN
Serokê Giştî yê Sendîkaya Rojnamegerên Tirkiyeyê (TGS) Gokhan Dûrmûş jî ev tişt gotin: "Me TGS ji serî heta dawî doz şopand. Li gor çavdêriyên me li gel beyanên hemû şahidan jî doz veguherandin dozeke cezayî ya li leha Nedîm. A rast ev nîşan dide ku huqûq bi temamî bêalîbûna xwe winda kiriye û biryarên polîtîk dide." Dûrmûş diyar kir ku di danişînan de şahidan gotiye ku ew Nedîm nas nakin, lê belê li gel van beyanan jî 8 sal û 9 meh ceza lê hatiye birîn û ev yek bi awayekî zelal nîşan dide ku ka huqûq çi qas serbixwe ye. Dûrmûş wiha domand: "Heke huqûq bêalî û serbixwe bûna li gor beyanên şahidan wê ceza li Nedîm nehatana birîn. Li vir rojnamegerî hat darizandin, li herêmê rojnamegerî hat darizandin. Li herêmê rojnamegeriyeke bêalî naxwazin. Ji ber vê bi cezayê li Nedîm hatiye birîn dixwazin rojnamegerên li herêmê çavtirsandî bikin. Lê wê rojnameger vê yekê qebûl nekin, wê tim nûçeyan çê bikin. Em dixwazin demildest dev ji vê biryarê berdin."