AMED - Yekemîn danişîna doza cînayeta Kemal Kurkut ê di Newroza Amedê de ji aliyê polîs Y.Ş. ve hat kuştin li 7'emîn Dadgeha Cezayên Giran a Amedê dest pê dike, Beriya danişînê dayika Kemal Secan Kurkut li salona edliyê kir qêrîn û wiha got: "Ji Kemalê min çi xwestin?" û xwest polîsê bersûc bi awayekî herî giran bê cezakirin.
Yekemîn danişîna doza cînayeta Kemal Kurkut ê di Newroza Amedê ya 21'ê Adarê de ji aliyê polîs Y.Ş. ve hat kuştin, li 7'emîn Dadgeha Cezayên Giran a Amedê dest pê dike. Beriya danişina dozê dest pê bike polîsan bi maşînê zirxî û TOMA dora edliyê dorpêç kirin. Dîsa li hin nokteyên derdora edliyê polîsên bi çekên giran digerin. Malbata Kurkut ji bo tev li danişîna dozê bibin ji Meletiyê hatin Amedê û ketin salona edliyê ya Amedê. Li gel malbatê Hevserokê KCD'ê Bedran Ozturk, parlamenterên HDP'ê Ayşe Acar Başaran û Dîlek Ocalan, aktîvîsta TJA'yê Ayla Akat Ata, Hevserokên HDP'ê yên amedê û nûnerên rêxistinên demokratîk amade bûn. Gelek rojnameger jî ji bo dozê
bişopînin li ber dadgehê amade bûn.
DAYIKA KEMAL: BILA CIWAN NEYÊN KUŞTIN
Dayika Kemal Kurkut Secan Kurkut, beriya danişîna dozê dest pê bike hat ber avahiya Edliyê ya Amedê û daxwazên xwe yên “edaletê” anî ziman. Kurkut, qêrîna xwe bilind kir û wiha got: “Bila êdî ciwan neyên kuştin. Çi ji Kemalê min xwestin." Kurkut xwest polîsê kujer bi awayekî herî giran bê cezakirin.
BIRAYÊ KURKUT: BILA KEMALÊN DIN NEYÊN KUŞTIN
Birayê Kurkut Cihan Kurkut jî anî ziman ku ji bo Kemalên din neyên kuştin ew dê heta dawî dozê bişopînin û wiha got: "Vî welatî êşên gelek mezin dît. Ji bo Ceylan, Berkîn, Kemal neyên kutin em li pey edaletê ne. Em îro li ber edliyê edaletê dixwazin. Lê em bawer nakin ev daxwazên me pêk bê. Heta daxwazên me yên edaletê pêk bê em dê edaletê bixwazin."
ÇÛN CIHÊ LÊ HAT KUŞTIN
Danişîna ku diviya bû saet di 10.00’an de dest pê bike bi sedema ku serokê dadgehê got dê dosyayê lêkolîn bike danişîn hiştin saet 13.30’ê piştî nîvro. Li ser vê yekê malbat û heyet bi hevre ji edliyê derketin û çûn cihê ku Kemal Kurkut lê hat kuştin qada Newrozê.