COLEMÊRG- Di sala 1995'an de gundiyên bi navê Recep Kurt û Kerim Încîn hatibûn kuştin û ji ber vê der barê Fermandarê Qereqola Cendirmeyan a Rondikê yê wê demê Binefser Yûnûs Karaca de doz hatibû vekirin. Di doza ku biryara beraeta Karaca hatibû dayîn de, Dadgeha Bilind biryara beraetê xera kir. Wê doz di 27'ê Sibata 2018'an de dîsa pêk bê.
Leşkerên ku di sala 1995'an de avêtin ser gundê Kelêtanê yê girêdayî navenda Colemêrgê, bi îdiaya "Alîkariya PKK'ê kirine" gundiyên bi navê Recep Kûrt û Kerîm Încîn binçav kiribûn û hatibû diyarkirin ku dema wan birine herêma operasyonê, li wir ji aliyê Fermandarê Qereqola Cendirmeyan a Rondikê Binefser Yûnûs karaca û Çawîşê Pispor Îbrahîm ve hatine kuştin. Malbata Kûrt û Încîn di sala 2005'an de gilî kirin û li ser giliyên wan doz hat vekirin û Serdozgeriya Komarê ya Colemêrgê di çarçoveya dozê de serî li îfadeya zêdeyî 150 kesî dabû. Di danişîna dozê ya di 27'ê Mijdara 2014'an de Dadgeha Cezayê Giran a Colemêrgê der barê binefser Karaca de biryara beraetê dabû.
Li ser vê parêzerê malbatê Cemal Demîr, di sala 2014'an de dosye şand temyîzê. Piştî dosye hat şandin Dadgeha Bilind biryara beraetê xera kir û biryar da ku doz ji nû ve bê destpêkirin. Piştî xerakirina biryarê, wê danişîna ewil a dozê di 27'ê Sibata 2018'an de li Dadgeha Cezayê Giran a Yekemîn a Colemêrgê pêk bê.
Parêzer Cemal Demîr têkildarî dozê axivî û diyar kir ku tevî gelek şahid, belge û delîlan Dadgeha Cezayê Giran a Colemêrgê der barê înfaza bêdaraz de biryara beraetê da. Demîr got ku biryara hat dayîn biryareke ecêb e û di warê huqûqê de skandal e. Demîr dest nîşan kir ku der barê bûyerê de zêdeyî 150 kes hatibûn guhdarîkirin, lê belê li gel vê yekê jî tenê der barê kesekî de doza cemaweriyê hat vekirin. Demîr wiha domand: "A rast çend kesan ev sûc kiriye. Beyanên şahidan vê yekê îşaret dikin. Lê belê tenê der barê binefser de doz hat vekirin. Ew jî piştî darizandineke dûr û dirêj beraet kir."
‘DIVIYA DOSYE BI TEMAMÎ BIHATANA XERAKIRIN'
Demîr, diyar kir ku piştî biryara beraetê wan dosye şandiye temyîzê û Dadgeha Bilind jî biryara beraetê xera kiriye û wiha got: "Ev tiştekî erênî ye, lê belê ne biryareke têrbar e. Di dosyeyê de gelek delîl hene. Diviya Dadgeha Bilind hinekî nîqaşa van delîlan bikirana. Ev xerakirineke qismî ye. Diviya Dadgeha Bilind delîlên din jî binirxandanan û dosyeyê bi temamî xera bikirana. Wê têkoşîna me ya huqûqî bidome."
MA / Mujdat Can – Ugur Atabay