NAVENDA NÛÇEYAN - Berpirsê Dîplimasiyê ya Federasyona Bakurê Sûriyê Salih Muslim, têkildarî geşedanên dawî yên li Rojhilata Navîn û Sûriye pêş dikevin diyar kir ku li Sûriye û Rojhilata Navîn pêvajoyek nû dest pê dike û wiha got: "DAIŞ hêj xelas nebûye. Hêj gelek gundên Himûs, Hama û Idlibê di destê DAIŞ'ê dene. Şer zû bi zû xelas nabe."
Berpirsê Dîplimasiyê ya Federasyona Bakurê Sûriyê Salih Muslim, li ser mijarên têkiliyên navbera Tirkiye û Îran, civînên Cenevre û Soçiyê, serdana Pûtin a li Sûrî, Misir û Tirkiyeyê, krîza Filîstîn Qudsê her wiha çekên ji QSDê re tê şandin de li Aryen Tv'yê tevlî bultena Aktuel Kurmanciyê bû.
Serokê Rûsyayê Vladimir Pûtîn duh ewil li Sûriyê bi Esad re, paşê li Qahîreyê bi Sîsî re û herî dawî li Enqereyê bi Erdogan re hevdîtin pêk anî. Pûtîn beriya bi Erdogan re bicive talîmata vekişîna hezên Rûsî yên ji Sûriyê da. Salih Muslim li ser pirsa derbarê vê mijarê de wiha axivî: "Li Rojhilata Navîn û Sûriyeyê pêvajoyeke nû destpê dike. Bêguman serdanên Pûrîn jî di çarçoveya vê de pêk hat. Bêyî ragihandina pilansaziyeke fermî Pûtîn hat Sûriyeyê û bi Esad re hevdîtin pêk anî. Ziyarate Misirê jî di rojevê de nebû. Diyar e ku xwestiye beriya Erdogan de van hevdîtinan bike. Piştî hevdîtina bi Esad re biryara vekişîna leşkerên Rûsî da. Her wiha bi Serokomarê Misrê Sîsî ku dijberê polîtîkayên Erdogan e re hevdîtin pêk anî.
ŞER ZÛTIR XELAS NABE
Wisa tê gotin ku bi biryara Pûtîn şerê li Sûriyê dawî bûye. Bêguman rastî ne wiha ye û şer hêjî dewam dike. Dibe ku navenda bajarên destê DAIŞê de hatibe rizgarkirin. DAIŞ hêza xwe winda kiriye. Lêbelê ev nayê wê wateyê ku DAIŞ dawî bûye. DAIŞ hêjî li Himus, Hama û Îdlîbê gelek gund destê DAIŞê de ye û hêjî êriş pêk tînin. Ji xeta Cizîrê heta Dêra Zorê DAIŞ hatiye paqijkirin.
LEŞKERÊN RÛSYAYÊ NAXWAZIN ŞERÊ NÛ DE CIH BIGRIN
Leşkerên Rûsyayê piştî vekişînê cihê xwe dewrê ti hêzî nakin. Ji ber ku leşkerên Îranê û Tirkiyeyê ji xwe li Sûriyeyê bi cî bûne. Rûsya dixwaze babetê şer biguherîne. Ji ber ku beriya niha DAIŞ hebû û her alî wan çeteyan weke terorîst didît. Lêbelê niha mîsal Îran û rejîma Baas her wiha Amerîka her çiqas El Nûsrayê weke terorîst bibînin jî Tirkiye wisa nabîne. Ji ber van gemarên heyî Rûsya di serdema nû de şêwazê hebûna xwe ya li Sûrî diguherîne.
Ya ku dixwiyê navbera Rûsya û Îranê de gelek nakokî hene. Dibe ku di dema dawî de Îran hejmara leşkerên xwe yên li herêmê zêdetir bike. Di nava vê rewşa tevlihev de aliyê Rûs dixwaze hinekî bandora xwe kêm bike û naxwaze leşkerên xwe bikin perçeyek vê şerê.´´
RÛSYA Û AMERÎKA LI GORÎ BERJEWENDIYÊN XWE ŞERÊ RADIWESTÎNIN
Salih Muslim derbarê destpêkirina pêvajoya siyasî ya li Sûriyê de jî çend niexandinan kir û wiha got: Biryara dawîkirina şerê an destpêkirina pêvajoya siyasî li Vîetnamê ji hêla Trûmp û Pûtîn ve hatibû girtin. Bêguman ev hêzên navneteweyî dixwazin li gorî berjewendiyên xwe şer dawî bibe. Lêbelê ji leşkerên Kazakîstanê bigre heta gelek çeteyên girêdayî dewleta Tirk û Îranê niha di nav xaka Sûrî de cih bûne. Pirsgirêk hêzên navneteweyî na, hêzên herêmî ne. Yanê Tirkiye û Îran e. Ev hêzana jî naxwazin şer biqede. Li gorî me di serdema nû de wekê şerê li dijî DAIŞê nebe jî, wê bi şêwazeke nû şer dewam bike.
Muslim di serdema nû de girînbûna civînên Cenevre û Soçiyê wiha berdewam kir: " Sîstema ku me afirandiye gelek şefaf û vekiriye. Heta bêjî li gorî rêgezên demokrasiyê ve hatiye avakirin. Ji bo krîza li Sûriyê ji xeynî vê ti alî projeyeke dernexistiye holê. Hemû proveke û derewên ku derbarê sîstema federalî de tê gotin yekser derdikeve holê. Gelek şande tên vir, serdanan dikin û her tiştî bi çavê xwe dibînin. Bêguman wê bandora vê yekê jî derkeve holê. Him li Soçiyê, him jî li Cenevreyê hemû hêzên navneteweyê wê van pêşketinan bibînin. Hêviya me jî ew e ku îredeya derketiye holê qebûl bikin û nas bikin. Ji bo avakirina demokrasiyê hêz pêwist e. Bêguman ji bo parastina demokrasiyê û di pratîkê de cih bigre jî pêwistiya vê yekê heye. Em hêzdar in û hêza me têra parastina serkeftiyan jî dike. Belê her çiqas girîngbûna Cenevreyê li holê bibe jî, heta niha bêencam mane. Me sedemên vê jî beriya niha yek bi yek anîbû ziman.
ÇEKÊN QSD"Ê Û HEVKARIYA BI KOLÎSYONÊ RE
Çekşandina ji QSDê re ku heta ji hêla dewleta Tirk ve bi awayeke nexêrxwazî hate ajîtîfe kirin û ji bo reşkirina hêzên Kurd hat bikaranîn de
Salih Muslim der barê nêzîkatiya Tirkiye ya li dijî kurdan jî rawestiya û wiha lê zêde kir: "Dewleta Tirk ji ber dijminahiya li hemberî gelê Kurd, ji bo bûyer û realîteyan çewt nîşan bide û vê mijarê weke arguman ji xwe re bikar tîne. Lêbelê rastî ne wiha ye. Ji ber ku DAIŞ hêjî xelas nebûye û şer dewam dike. Ew komên ku bajarên Ewropayê tehdît dikirin û li wan deran êriş pêk dianîn hêjî hene.
Amerîka jî vê yekê dibêje. Dema şer dawî bû û komên çete bi temamî hat paqijkirin wû şandina çekan jî rawestînin. Yên ji me re hatiye gotin ev e. Di vê çarçoveyê de hevkariya me ya bi hêzên koalîsyonê re wê dewam bike. Lê yê duxuyê ew e ku dewleta Tirk wê derew û durûtiya xwe ya li ser vê mijarê bidomîne.
JI BO QUDSÊ Û KERKÛKÊ MODELA ROJAVA
Ji bo jiyana bi hev re, ji bo wekhevî û azadiyê modela Rojava gelek serkeftî ye. Bêguman ev model xwe dispêre fikr û ramanên Rêberê Gelê Kurd Abdûllah Ocalan. Ev model ne tenê ji bo Rojava û Kurda, ji bo hemû Rojhilata Navîn û hemû netewan e. Bajarê Qudsê ciheke dîrokî ye. Ji bo Misilman, Cihû û Xirîstiyanan bajareke pîroz e. Di modela me de çiqas ol netewe hebe dikarin bi awayekî serbixwe û azad xwe temsîl bikin û mafê xwe biparêzin. Di vê çarçoveyê de ne tenê ji bo Qudsê ji bo Kerkûk û Mûsilê jî eger modela Rojava were tercîhkirin wê aştî û aramî ava bibe."