Bi polîtîkaya şer a hikumeta AKP’ê re, di encama şerê 2 salin bê navber berdewam dike de, bi sedan mirovan jiyana xwe ji dest dan. Di vî şerê du salan de hêzên dewletê êrîşê cenazeyên endamên HPG’ê kirin û li dijî nirxên gelê kurd bê hurmetiyên mezin kirin. Bi taybetî polîs û leşkran serkêşiya vê bêhurmetiyê kirin. Cenazeyên ku radikin saziya tiba edlî, bi mehan nadin malbatan, her dem îşkenceyê li malbatan dikin û cenazeyên ku didin malbatan jî polîs û leşker li ser disekinin û nahêlin malbat li gorî baweriya xwe cenazeyê zarokên xwe defin bikin. Li gel van zextan, qayûmên ku tayînê şaredariyên DBP’ê kirin, wesayitên cenazeyan nadin malbatan ku malbat pê cenazeyê zarokên xwe bibin. Endamê Kongreya Îslama Demokratîk (KÎD) Mele Yusuf Andan ê demek dirêj e meletiyê dike, 28 salin bi taybetî cenazeyên gerîlayên HPG’ê dişo, kiryar û pêkanînên li dijî cenazeyên vegot.

 

‘ÇIQAS NÊZÎ XWEDÊ NE’ 

 

Andan da zanîn ku dema dema yekî ne misliman jiyana xwe ji dest dida, apê Hz. Muhammed bavê Hz. Alî Ebû Talîb bîn Abdulmuttalîib, cenazeya wan dide şûştin, bi kefen dikirin û defin dikirin. Adnan ji Qurana pîroz minak da û ev tişt got: “Yên ku li ser navê ola Îslamê li dijî cenazeyan van bêhurmetiyan dike, gelo çiqas nêzî Xwedê û Quranê ye? Mişrikan li dijî cenazeyê Hz. Hamza bê hurmetiyên mezin kirin, lê Hz. Muhammed nehişt kes xirabî li cenazeyên mişrikan bike.” 

 

‘TU KES NIKARE XWE XILAS BIKE’

 

Andan diyar kir ku 28 salên wî li ser goristanan, bi definkirin û şûştina cenazeyan derbas kiriye û ev tişt got: “Îsal 3 endamên HPG’ê yên li Licê jiyana xwe ji dest dan, piştî 76 rojan cenazeyê wan hat teşhîskirin. Ev cenaze bi çekên kîmyewî hatin kuştin û serê hersêyan jî tune bû. Beriya 2 salan min cenazeya gerîlayekî ku bûyî 40 parçe min dît û min bi destê xwe defin kir. Li tu deverên cîhanê ev exlaq nayê dîtin, cihê wê di mirovahiyê de tune ye. Heke exlaq hebûya ev tişt li cenazeyan nedikirin. Em hemû em ê di vê keştiyê de winda bibin, tu kes nikare xwe xelas bike. Ji ber vê yekê bila tu kes heqaretê li cenazeyan neke.”

 

‘LI HEMBERÎ CENAZEYAN BERPIRSYARÊN ME HENE’

 

Andan bal kişand ser astengiyên li pêşiya definkirina cenazeyan jî û wiha pê de çû: “Ez bi xwe kiryarên li dijî cenazeyan dijîm. Ez bang li polîs û leşkeran dikin; werin em bi hevre cenazeyan bişûn û defin bikin, bi çekan li ser serê me nesekinin. Ji ber ku polîs û leşker jî ji şûştin û definkirina cenazeyan berpirsyarin. Yên vê yekê nekin dê zilmê li xwe bikin. Ew çi dikin bi kamereyan me dikşînin. Di encamê de mirovekî jiyana xwe ji dest daye, nasnameya wî/ê çi dibe bila bibe, ji mirinê şûnde tiştek tune. Ji ber vê yekê berpirsyariya me li hemberî cenazeyan heye.”

 

‘BIRYARA ASTENG KIRINA CENAZEYAN SIYASÎ YE’ 

 

Andan anî ziman ku astengkirina şînê û girtina avahiyên şînê li dijî ol û hiqûqê ye û axaftina xwe wiha domand: “Şîn pîroz e, lê îro pîroziya wî ji holê hatiye rakirin. Ne qanûn maye û ne jî nîzam. Li tu dera cîhanê ev pêk nayê û ev bi fermanê pêk nayê. Dive li hemberî van pêkanînan, her kes xwedî li cenazeyan derkeve.”

 

MA / Ozgur Paksoy