ŞIRNEX - Xebatkarên midûriyeta AFAD'a Şirnexê têkildarî derxistina cenazeyên 3 karkerên kana komirê ya Şirnexê ku yekîneyên AFAD'a Wanê ji bin hezarê derxistin, diyar kir ku AFAD'a Şirnexê ji aliyê kesên pispor û amûrên pêwist ve ne têr û tije ye.
Di 4'ê kanûnê de di Kana Komirê ya navbera bajaroka Gundikê Melê û gundê Kironê yê Şirnexê, grîzû pêk hatibû. Di teqînê de Abdurrahman Tunç û birayê wî Omer Tunç û Îdrîs Înal ên ji bo alavên xwe bigirin jiyana xwe ji dest dabûn. Li ser vê welatiyan agahî da ekîbên AFAD û 112'an. Yekîneyên AFAD'a Şirnexê ku çûn cihêbûyerê û bi saetan lêgerin kirin nekaribûn karkeran ji binê enkazê derxin. Piştî xebatên demdirêj ên ekîban nebûn çare, yekineyên AFAD'a Wan û Êlihê hatin lêkolin kirin û cenaze derxistin. Ekîbên AFAD'ê dan zanîn ku ew dema peyayê kanê bûne, wan 3 karker di nava avê de dîtine.
Di 17'ê Cotmehê de jî dîsa li Şirnexê hezan pêk hatibû û di kana komirê de 8 karkeran jiyana xwe ji dest dabûn. Pişti van bûyeran niqaşên ku yekîneyen pispor ên AFAD’ê li Şirnexê tune û nikare bi lez karkeran rizgar bike pêş ket.
XEBATKARÊN AFADÊ: TEKNÎK KÊM E
Xebatkarên Midûriyetae AFAD'ê ya Şirnexê diyar kir ku ji bo lêgerîn û rizgarkirina karkeran têr û tije teknolojî û amûrê wan tune ye. Dîsa di milê personelên pispor de kêmasiyên wan hene. Xebatkarên AFAD'ê diyar kirin ku ji ber nebûna amurên teknîkî û pispor neçar dimînin ku yekîneyan ji derve bixwazin. Xebatkaran anîn ziman ku yekîneyên pispor ên perwerdekirî ku karibin têkevin zikê erdê û lêkolînê bikin tune û ji ber vê yekê nikarin karkeran rizgar bikin.
Parlamentera HDP'ê Aycan Îrmez jî diyar kir ku li Şirnexê ekîbên pispor ên AFAD'ê tune ne û nebûna ekîbên pispor pirsgirêkek mezin e."
Aycan Îrmez anî ziman ku bi vê yekê dewlet 2 rêyan nîşanî gel dide û wiha got: "Dewlet dibêje an hûn dê her dem birçî bin. An jî hûn dê yek bi yek di kanên komirê de bimirin. Polîtikayên arizîkirinê bandorek neyînî li ser herêmê dike. Niha hemû çavkaniyên xwezayê yên bin zikê erdê tev ji destê dewletê derketine. Hemû ketine destê şîrketên bazirganiyê. Li vir ewlehiya canê welatiyan yekser berpirsiyariya dewletê ye. Divê dewlet tedbîrê vê ewlehiyê bistîne."
‘DIKARÎBÛN NEHÊLIN 3 KES BIMIRIN'
Îrmez, destnîşan kir ku kanên komirê yên li Şirnexê li gelek herêman belav bûne û yekîneyên AFAD’ê di vê mijarê de kêm in û di milê personel û teknîkê de têr nakin û wiha berdewam kir: "Zêde qîmetê nadin xurtkirina AFAD'ê. Ev jî nîşan dide ku li vir qîmetê canê mirovan tune ye. Ger ku saziya AFAD'ê li vir hebûya û bi hêz bûya dibû ku 3 canê me jiyana xwe ji dest nedin. Qe nebûya dibû ku Îdris Înan bi saxî xelas bikin. Yê tenê li heviya yekîneyên Wan, Êlih û Mêrdîne rawestiyan. Mixabin niha îktîdara ku tenê bi dewlemendîbûna xwe mijûl dibe heye. Dibêje ez dê çawa berîka xwe tije pere bikim."