Parêzer Mûstafa Eraslan ku cara ewil di 16'ê Çileya 2002'yan de bi Rêberê PKK'ê Abdûllah Ocalan re hevdîtin çê kir, anî ziman ku ji bo ew bi Ocalan re hevdîtinê çê bike herî kêm 60 carî çûye Îmraliyê lê belê tenê wî 14 caran bi Ocalan re hevdîtin çê kiriye. Herî dawî di sala 2011'an de Eraslan bi Ocalan re hevdîtin çê kir û diyar kir ku hemû hevdîtinên bi Ocalan re di bîra wî de ne. 

 

‘HEMÛ TIŞTÊN RABER KIRIN PÊK HATIN' 

 

Eraslan wiha got: "Herî zêde bîrbiriya Ocalan tesîr li min kir. Hêla wî ya ku herî zêde ez heyirandim jî, pêwendîdayîna navbera gelek bûyer û diyardeyan bû. Bi rastî jî kesekî muhteşem e. Ev kûrbûna wî û pêşbiniyên wî hêlên wî yên bandorker in. Jixwe gelek tiştên ku raber kirin paşê pêk hatin." 

 

'HAFIZEYA WÎ ZAF HÊZDAR E' 

 

Eraslan diyar kir ku ew jî 17 mehan di Girtîgeha Tîpa F'yê de maye û wiha behsa bandora ku Girtîgehên Tîpa F li ser mêjiyê mirovan dikin kir: "Birêz Ocalan ji 15'ê Sibata 1999'an ve di girtîgehê de ye. Evqas di girtîgehê de ye û di bin şert û şirûtên tecrîdeke giran de ye, lê dîsa jî hafizeya wî zaf hêzdar e. Ev hêla wî ji wan hêlên wî yên bandorker e. Dema hevalekî parêzer didît, di hevdîtina din de digot tu filan kes bûyî ne wisa. Ev hêla wî pir muazam e." 

 

Eraslan diyar kir ku Ocalan tevî peta xwe ya avê dihat cihê serdanê û ev tişt gotin: "Ji ber çavên wî şil dibûn, selpaka xwe jî dianî. Karê ewil ê ku Birêz Ocalan dikir saeta xwe derdixist. Berçavka wî hebû, paşê wê derdixsit. Pênûsa xwe datanî ber xwe. Nîşe digirtin."

 

Eraslan, diyar kir ku hêleke espiriyî ya Ocalan jî heye û bîranînek vegot: "Di hevdîtina me ya piştî bûyera Oremarê, em bi êrîşekê re rû bi rû man. Li hemberî Fermandariya Cendirmeyan a Gemlîkê komeke faşîst êrîşî me kir. Di êrîşê de me derb nexwarin. Piştî astengkirina êrîşî em çûn qada serdanê. Wê demê ji me re got 'hûn ê carinan bên carinan jî neyên. Dema hûn bên wê carinan we wisa bitirsînin'. Espiriyên wisa dikir." 

 

‘KAXEZA KU OCALAN DA NEDAN MIN' 

 

Eraslan, anî ziman ku di hevdîtina wan de kaxezên wan ên nîşeyan qediyane û wiha axivî: "Kaxeza ber xwe dirêjî min kir. Min ew kaxez wergirt û nîşe lê nivîsandin. Di hevdîtina me ya berê de nîşeyên ku me digirtin ji me distendin, fotokopiyên wan dikişandin û paşê didan me. Lê di wê hevdîtinê de kaxeza ku ji bo nîşeyan bigirim Ocalan da min nedan min. Dizanim bi zanebûnî ev yek kirin." 

 

Eraslan, di hevdîtinên ku beriya 8'ê Adarê û 21'ê Adarê de Ocalan Newroza gel pîroz kiriye û wiha domand: "Bi taybetî dipirsî ka 8'ê Adarê çawa derbas dibe. Di wan hevdîtinan de der barê jinan de perspektîfên berfireh berpêş dikir. Dibe ku tam nayê bîra min lê, digot di xeta bîrdoziya azadiya jinê de jina azad civaka azad bi xwe ye, azadiya civakê bi azadiya jinê pêkan e, jin cinsa çînî ya ewil e ku hatiye xistin û şoreşa jinê Şoreşa Kurdistanê bi xwe ye." 

 

‘OCALAN JI BO GELAN SIÛD E' 

 

Eraslan diyar kir ku Ocalan ji bo kurdan siûdek e û wiha got: "Ocalan ji bo Tirkiye û civakên Tirkiyeyê jî siûdek e. Ya divê bê dîtin ev e. Belkî ji bo kurdan bêtir ji bo gelên din siûdek e. Çimkî gelên din, gelên kêmar ên din wek dewlemendiyeke çandî dibîne û dibê divê hemû gel bi hev re bijîn." 

 

‘BI SALAN MIN WE DI DILÊ XWE DE VEŞART' 

 

Eraslan, dest nîşan kir ku tecrîd sepandineke dermirovahiyî ye û wiha got: "Tecrîd li hemberî kê dibe bila be û dema wê çi qas dibe bila be, tiştekî dermirovahiyiyî ye. Hele hele li dewleteke huqûqî di bin tecrîdê de girtina girtiyekî siyasî qet nayê qebûlkirin. Hem raporên CPT'yê hem jî biryarên Dadgeha Mafên Mirovan a Ewropayê jî diyar dikin ku ev tecrîd nayê qebûlkirin." Eraslan dest nîşan kir ku ew wisa difikire ku wê bi têkoşîan gelê kurd di demeke nêzde dawî li tecrîdê bê û herî dawî ev tişt gotin: "Ya ku dikeve ser milê me divê em bi hîsgirî tev bigerin, çi parêzerên Ocalan çi jî dildarên Ocalan divê hemû mirov bi hev re tev bigerin. Dema Ocalan li Romayê bû wiha gotibû 'Bi salan min we di cihê herî kûr ê dilê xwe de veşart. Min we parast.' Wisa difikirim ku divê niha gel jî Ocalan biparêze." 

 

MA/Sadiye Eser