NAVENDA NÛÇEYAN - Çapemeniya cîhanê cihekî fireh da tayînkirina qeyûman a Şaredariyên Amed, Mêrdîn û Wanê. Çapemeniya cîhanê got “Demek dirêj bû" amadekariya operasyonên qeyûmê dihatin kirin.
Wezîrê Karên Hundir di 19'ê Tebaxê de qeyûm tayînî Şaredariyên Bajarên Mezin ên Wan, Amed û Mêrdînê kirin. Hevşaredar ji peywirê girtin û Walî tayînî şûna wan kir. Çapemeniya cîhanê cihekî fireh da tayînkirina qeyûman.
Ajansa Euronews ku bi gelek zimanan weşanê dike cih da gotina Hevşaredarê Amedê Selçuk Mizrakli ya “Erdheja 17'ê Tebaxa 1999'an çawa di dîroka Tirkiye de bû rojek reş wê 19'ê tebaxê jî di dîroka siyaseta Tirkiye de wisa bibe. Ev jî erdheja siyasî ya 19'ê Tebaxê ye."
EURONEWS: PAQIJKIRINA SIYASÎ
Rojnameyê di nûçeyê de bi sedan endamên HDP'ê yên di çarçoveya operasyonê de hatin binçavkirin wekî “paqijiya siyasî" pênase kir. Rojnameyê dîsa cih da çalakiyên li Amedê yên li dijî qeyûman. Rojnameyê di nûçeyê de diyar kir ku mazbatayên hevşaredarên HDP’ê yên di hilbijartina 31'ê Adarê de qezenç kiribûn hêj nedane wan û tasfiyekirina piştî darbeya 15'ê Tîrmehê li Kurdan xistiye.
REUTERS: ERDOGAN BERIYA HILBIJARTINÊ GOTIBÛ
Ajansa Reutersê jî di nûçeya parve kir de diyar kir ku gel li dijî qeyûman bertekên xwe anîn ziman û rastî mudaxaleyên hişk hatin. Ajansê diyar kir ku di heman wextê de li 29 bajaran zêdeyî 400 HDP’î hatin binçavkirin. Ajansê dîsa bal kişand ser gotina Erdogan a piştî hilbijartina sala par a gotibû "Em ê dîsa qeyûm tayîn bikin" Reuters, anî ziman ku sucdariyên der barê HDP’ê de li ser derewan hatine avakirin.
Reuters, da zanîn ku CHP'ê û Serokomarê AKP’ê yê berê û Serokwezîrê AKP'ê yên berê jî ertek nîşanî operasyonan dane.
TAZ: JI BER HILBIJARTINA STENBOLÊ QEYÛM TALOQ KIRIBÛN
Rojnameya li Almanya tê weşandin Tageszeitung (TAZ) jî bal kişand ser gotina Serokê AKP'ê û Serokomar Tayyip Erdogan a beriya hilbijartinê gotibû “Siyasetmedarên li dijî polîtîkayên min derkevin ezê wan ji peywirê bigirim" Rojnameyê diyar kir ku tayînkirina qeyûman ji ber hilbijartina li Stenbolê hatiye taloqkirin.
LE MONDE: DARBEYEK NÛ LI MUXALEFETÊ XISTIN
Rojnameya navdar a Fransa Le Monde bi ser navê “Zextên li Tirkiye" nûçe weşand. Rojnameyê operasyonên li Tirkiye jî wekî “Darbeya nû ya li diji muxalefetên Tirkiyeyê" pênase kir. Rojnameyê di nûçeyê de ani ziman ku kesên hatine hilbijartin hêj 5 mehên wan neqediya ye û HDP bi taybetî piştî 2016’an heta niha di bin zextên dijwar de ye.
Le Monde, di nûçeyê de da zanîn ku li dijî zextên li ser HDP'ê hem CHP’ê û hem jî di nava AKP'ê de jî bertek zêde bûne. Dîsa gotina Hevserokê Giştî yê HDP'ê Sezai Temellî ya kesên hatine binçavkirin yekî jî tu sûc nekiriye.
NZZ: KURDAN DI 31'Ê ADARÊ DE XWE NÎŞAN DABÛN
Rojnameya li Swêdê weşane dike Neue Zürcher Zeitung (NZZ) di nûçeya bi îmzeya Inga Rogg de diyar kir ku operasyonên qeyûmê piştî derbeya 15'ê tîrmehê dest bi tasfiyekirinên mezin kiriye û vê yekê didomîne. Nûçeyê diyar kir ku ji ber li pêş Serokê AKP'ê Erdogan hilbijartin tune ye di mijara pirsgirêka Kurd de îhtîmala rêbazek nû bişopine derketiye. Rojnameyê di nûçeyê de da zanîn ku hevdîtina bi Rêberê PKK'ê Abdullah Ocalan jî van spekulasyonan xurt dike. Rojnameyê da zanîn ku Erdogan bi darbeya niha fêdeya wî di çareseriya bi aştiyane de tune ye. Dîsa dixwaze bi zext û tundiyan Kurdan têxin xizmeta xwe. Lê Kurdan di 31'ê Adarê de aşkere nişani wan dan ku ev rêbaz ne çareserî ye.
DIE PRESSE: DEMEK DIRÊJ E HATIYE PLANKIRIN
Rojnameya Die Presse a Avusturya wêneyê ku polîsan mudaxaleyî girsê dike derxist pêş û diyar kir ku Serokomar Erdogan bi tundî Hevşaredarên HDP’î ji peywirê daxist. Rojnameyê diyar kir ku ji plan û serdegirtina şaredariyan xuya bû ku demek dirêj ev yek hatiye plankirin.