ENQERE - Endama MYK’a ÎHD’ê Nûray Çevîrmen, diyar kir ku ji sala 2017’an û vir ve 73 girtiyan jiyana xwe ji dest dan û got: “Di demên dawî de li girtîgehan binpêkirinên mafan pir zêde bûne. Li girtîgehan dest bi pêkanîna rejîma tirsê hatiye kirin.”
Înîsiyatîfa Azadiya Girtîgehên Nexweş, bi armanca balê bikişîne ser rewşa girtiyên nexweş di hefteya 259’an de li ber Şaxa Komeleya Amafê Mirovan (ÎHD) ya Enqereyê daxuyanî da çapemeniyê. Endam Desteya Rêveberiya Navendî (MYK) ya ÎHD’ê Nûran Çevîrmen, daxuyanî da û diyar kir ku di salên dawî de binpêkirinên mafan zêde bûne, hemû gilî û serlêdan bên encam dimînin.
Çevîrmen, di dewama axaftina xwe de wiha got: “Ligel ewqas mûameleyên xerab ên li girtîgehan jî, tu lêpirsîn nehatine vekirin û derbarê berpirsiyaran de lêpirsîna hiqûqî nehatiye dest pê kirin. Li girtîgehan dest bi pêkanîna rejîma tirsê kirine. Îşkence û muameleya xerab li Girtîgeha Ewlekariya Bilind a Xerpêtê ku weke girtîgeha pîlot hatiye diyar kirin dewam dike. Ji ber binpêkirinên mafên mirovan, mûameleyên xerab û îşkenceyên heyî, ceza di nava ceza de ferzî girtiyan dikin.”
73 TIRTIYAN JIYANA XWE JI DEST DAN
Çevîrmen, da zanîn ku rewşa girtiyên nexweş her roja diçe girantir dibe û wiha bilêv kir: “Ji sala 2017’an û vir ve, 73 girtiyan jiyana xwe ji dest dan. Ji girtiyên jiyana xwe ji destdan dan 39 jê girtiyên nexweş bûn.”
EV 7 SALIN BIRÎNA WÎ VEKIRIYE
Çevîrmen, bal kişand ser rewşa girtiyê nexweş Îsmet Akın ê li Girtîgeha Tîpa F a Kirikkale girtiye û Yûsûf Bor ê li Girtîgeha Sergirtî ya Ewlekariya Bilind a Wanê û wiha axivî: “Îsmet Akin di sala 2012’an de bi awayekê birîndar hat girtin û rakirin Fakulteya Tıpa Dîcle. Piştî hat emeliyatkirin, wî şandin Girtîgeha Tîpa D Amedê. Akin sê salan li vê derê dimîne. Dûre wî sewqî Girtîgeha Tîpa F a Kirikkale dikin. Ligel ku bi ser emeliyata wî re 7 sal derbas bûn jî, hîna birîna wî baş nebûye û vekiriye. Divê Akin di tedawiyek baş re derbas bibe. Lê neyê darman kirin.”
JI SEDÎ 95 NABÎNE
Çevîrmen, derbarê rewşa tenduristiya girtiyê nexweş Yûsûf Bor ê 52 salî de jî agahî dan û wiha dawî li axaftina xwe anî: “Bor ji sedî 95 nabîne û ligel vê jî nayê derman kirin. Ligorî gotinên hevjîna wî ger di demê xwe de bihata derman kirin wê rewşa wî evqas giran ne bûya. Bi alîkariya hevalên xwe jiyana xwe dewam dike. Divê demildest bê derman kirin. Bi windarkirina çavên xwe re rû bi rû ye. Ji bo ku di şert û mercên baş de bê dermankirin, divê cezayê wî bê taloqkirin û li gel malbata xwe bê dermankirin.”