EDENE - Seroka Şaxa SES'ê ya Edeneyê Belgîn Işik diyar kir ku di 10 salên dawîn de, bûyerên îstismara zarokan ji sedî 700 zêde bûne û pêşniyar kir ku ji bo pêşîligirtina îstismara zarokan, Pergala Parastina Zarokan bê avakirin'
Seroka Şaxa Sendîkaya Kedkarên Xizmeta Civakî û Tenduristiyê (SES) ya Edeneyê Belgîn Işik zêdebûna bûyerên îstismara zayendî nirxand. Belgîn Işik diyar kir ku polîtîkayên dewletê dibin sedema zêdebûna bûyerên îstismara zayendî û wiha got: "Ji 4 bûyerên tecavuzê yek jê têkildarî zarokan e. Tê gotin ku li welatê me, di 10 salên dawîn de, bûyerên îstismara zarokan ji sedî 700 zêde bûne. Her wiha hejmara jinên ku tûndî li wan tê kirin, birîndar dibin û dimirin jî rewş bi heman rengî ye." Işık anî ziman ku nîqaşên neyarane yên têkildarî zagona hejmara 6284'an serdestiya zilam a di civakê de zêdetir û berbelavtir dike û ev tişt got: "Jin û zarokan bêqîmet dike û zilaman jî bi hêz û wêrek dike. Ev bingeha ku hatiye avakirin, dibe sedema guhertina neyînî ya mafên jin û zarokan ku bi têkoşîn hatine bidestxistin û rê li ber sûcên giran ên li dijî jin û zarokan vedike."
PERGALA PARASTINA ZAROKAN
Di berdewamê de Işık bal kişand ser girîngiya têkoşîna bi bandor û encamgir a li dijî îstismara zayendî û ev tişt gotin: "Divê hişmendiya 'Herkes ji her tiştî berpirsyar e' bê pejirandin. Divê sedemên civakî yên îstismara zarokan ên Tirkiyeyê derkevin holê. Divê li ser vê yekê pê re bi awayekî lezgîn Pergala Parastina Zarokan bê avakirin, bibe ku her zarok bê şopandin. Di mijara îstismar û îhmala zarokan de têkildarî nêrîna zarokan, divê li Navendên Tenduristiya Civakî yên ku di pergalê de cih bigirin bijîjk, li dibistanan mamoste, polisê zarokan û dayik-bav bên agahdarkirin. Divê perwerdeya vê yekê bê girtin û dema ku îstismar û îhmala zarokan ferq bikin, karibin pê re xwe bigihînin yekîneyên xizmeta civakî yên ku dikarin bergiriyê bigirin. Ji bo vê yekê divê li her tax û herêmê, yekîneyên xizmeta civakî yên ku xizmeta bergiriyê bidin bên vekirin. Lewre her zarok bi rîska binpêkirina maf re rû bi rû ye. Paşê meqamên edlî û yekîneyên ku karibin zarokê hatiye îstismarkirin baş bikin jî parçeyê herî girîng ê vê pergalê ye. Lê pirsgirêka bingehîn ew e ku em hê jî jin û zarokan wek kesên ku mafên wan hene nabînin.
MA / Hamdûllah Kesen