ÊLIH – Endamên Meclîsa Ciwanan a HDP’ê yên li Heskîfê hatin binçavkirin gotin ku polîsan ji wan re gotiye axaftina bi kurdî di binçavan de qedexe ye û li ber kamerayan tazî li ser wan lêgerîn pêk anîne.
Li navçeya Heskîfê ya Êlihê di 5’ê tebaxê de 19 endamên Meclîsa Ciwanan a HDP’ê ku xwestin li xwedî li dîroka Heskîfê ya dê di bin avê de bimîne derkevin polîsan ew binçav kir. Polîsan li ciwanan da û wan birin Miduriyeta Polîsan a Êlihê û piştî îfadeyên wan hat girtin berdan. Ciwanan got polîsan ji wan re gotiye axaftina bi kurdî di binçavan de qedexe ye û li ber kamerayan tazî li ser wan lêgerîn pêk anîne.
‘EM LI DIJÎ TUNEKIRINA DÎROKÊ DERDIKEVIN’
Berxwedan Yenî yê hatibû binçavkirin da zanîn ku polîsan bi hovîtî wan binçav kiriye û got: “Meclîsa me li dijî talankirina xweza û dîroka Heskîfê biryara çalakiya nobetê girtibû. Em dixwazin li dijî talankirina Heskîfê derkevin. Bendava Ilisû xwezaya herêmê talan dike û dike ku bi hezaran însan ji warê xwe bibin û koç bikin. Di şexsê Heskîfê dixwazin li tevahiya Kurdistanê bêmirov bikin.”
‘ŞIDETÊ LI ME KIRIN’
Yenî anî ziman ku wan li Heskîfê di çarçoveya mafên xwe yên demokratîk de çalakî li dar bixin û wiha dewam kir: “Polîsan destûr neda em bi komî bimeşin û me binçav kirin. Tenê ji bo ku nasnameyek me kurdî û siyasî hebû polîsan êrîşî me kir û şidetê li ser me pêk anîn. Muameleya li dijî mirovahiyê li ser me pêk anîn. Polîsan îşkence li me kir. Hevalên me bi erdê re kaş kirin. Polîsan ji me re got ‘dema canê me aciz bibe em ê li we bidin.’ Bi awayek kêfî êrîşî me dikirin. Me ji paş ve kelepçe kirin.”
‘GEF LI ME XWARIN’
Yenî destnîşan kir ku heta wan anîne emniyeta Êlihê polîsan şidetê li wan kiriye û got: “Heqaret li me kirin û xwestin rûmeta me bişkînin. Li emniyeta Êlihê pêkanînên kêfî dewam kirin. Helwestek ku em îlegal in nîşan dan. Dixwestin meclîsa me îlegalîze bikin. Gefên cezakirinê û kuştinê li me xwarin.”
Yenî got ew ê li dijî tiştên hatine serê wan gilî bikin.
‘HÛN NIKARIN BI KURDÎ BAIXIVIN’
Endama Meclîsa Jinên Ciwan a HDP’ê Sema Can jî da zanîn ku polîsan wan dorpêç kiriye û wiha got: “Dema me xistin maşîneya polîsan sirûda mehtere lêdan û strana ‘Olurum Trukiyem’ bi me dan guhdarkirin. Piştî ev guhdarkirin xilas bû, heqaret li me kirin. Ji me re gotin ‘hûn nikarin di binçavan de bi kurdî biaxivin.’ Nedihiştin em serê xwe bifetilînin. Lê bila ew jî viya baş bizanibin em ê li dijî zext û şideta wan serê xwe netewînin.”