Çiyayên Mûnzûrê yên Dersimê ji qada madenê re vekirin û ev der wek qada madenê hat ragihandin. Xwezaya xweşik û ku mirov jê têr nabe ya Dersimê bi projeyên wek bendav û madenê talan dikin. Ekolojîst Haydar Çetînkaya talankirina xwezaya li Dersimê nirxand.  

 

‘LI HER DEVERA TIRKIYEYÊ TALAN HEYE’ 

 

Çetînkaya da zanîn ku li gelek deverên Tirkiyeyê talankirina xwezayê didome û got: “Herî zêde li Dersimê xweza tê talankirin. Dewlet ji bo maden û enerjiye hemû qanûnan hêsan dike û bi rehetî van yasayan diguherîne. Civak xwedî li xwezaya xwe derdikeve û bertek nîşanî talanê dide. Lê dewlet bi tundî êrîşî civakê dike.” 

 

‘TALANKIRINA MEZIN LI HESKÎF Û DERSIMÊ YE’ 

 

Çetînkaya destnîşan kir ku ji bo talankirina xwezayê hiqûq û qanûn tên binpêkirin û domand: “Talankirin û hilweşandina herî mezin a çandî, xwezayî û dîrokî li Heskîf, Perî û Mûnzûrê pêk tê. Tenê ne li van deran, li gelek cihên girîng ên din jî pêk tê. Li çar hawîrdorên Tirkiyeyê xwezayê dipelêxin û wêran dikin. Dema mirov li nexweşeya talankirinê dinêre heta niha 550 bendav temam bûne. Talankirin qat û qat zêde bûye. Xwezaya li Tirkiyeyê kirine qurbanên 550 bendavan.” 

 

BI DEHAN PROJE XISTINE MERIYETÊ

 

Çetînkaya anî ziman ku di 10 salên dawî de xwezaya Dersimê serûbin ango talan kirine û bi dehan proje li herêma Dersimê xitine meriyetê û gelek ji wan temam bûne. Çetînkaya got li gelek deveran madena kromê bêkontrol derdixin. Çetînkaya diyar kir ku ji ber kanên xîzê û mermer ên li Dersimê talankirin gihîştiye astek bi xeter û xof. 

 

WÊ 30 GUND Û MEZRE BÊN TUNEKIRIN 

 

Çetînkaya anî ziman ku projeyên madena zêr û madenên din wê encamên talûke derxin holê û gelek şirket bi salane ji bo madenê xwezayê talan dikin. Çetînkaya da zanîn ku heta niha ji bo gundê Topuzlu yê Pulurê, gundê Karayonca yê Pulurê, gundê Karaoglan yê Pulurê, dîsa gundê Topuzlu yê Pulurê û gundê Geyîksuyu yê Dersimê destûra rûhsatan hatiye danîn û dê li van herêman 30 gund û mezre ji nexşeya Dersimê bên paqijkirin. 

 

‘WERIN EM LI DIJÎ JEHRÎKIRINA DERSIMÊ DERKEVIN’ 

 

Çetînkaya diyar kir li çar hawîrdorên Dersimê ji bo madenê xwezayê û erdnîgariya pîroz bikin qurban û wê ev maden Dersimê tune bike. Çetînkaya got ji bo van cihê madenê yên li Dersim û navçeyên wê jî destûr hatiye dayîn û Çiyayên Mûnzûrê pêşkêşî rantê dikin. Çetînkaya destnîşan kir ku rantxwir û desthilatdarî dixwazin bi van projeyan Dersimê jehrî bikin. Çetînkaya li dijî talankirina Dersimê bang li raya giştî û civakê kir û xwest her kes dest bide destê hev û bi hev re li dijî talankirina Dersimê derkevin. 

 

MA / Semra Turan