HEWLER - Endamê HDP'ê Nasir Yagiz ku li dijî tecrîdkirina Rêberê PKK'ê Abdullah Ocalan 187 rojan ket greva birçîbûnê û piştî peyama Ocalan dawî li çalakiya xwe anî, diyar kir ku Tirkiye dîsa tecrîdek giran daye destpêkirin û xwest her kes li dijî vê yekê têkoşîna xwe berdewam bike. 

 

Endamê HDP'ê Nasir Yagiz ku li dijî tecrîdkirina Rêberê PKK'ê Abdullah Ocalan di pêşengiya Hevseroka KCD'ê Leyla Guven de dest bi çalakiya greva birçîbûnê kir û piştî têkoşîna 187 rojan li ser banga Ocalan dawî li çalakiya xwe anî, tecrîdkirina ku niha didome û astengiyên li pêş hevdîtina parêzeran ji Ajansa Mezopotamya re nirxand. 

 

Yagiz, diyar kir ku yên bûne malê vê dîrokê û gel bi wijdana xwe ya ku pê bawer xwedî li rêbertiya xwe derket û wiha got: "Di heman demê de bi çalakiyên xwe yên fedaî jî xwedî li rêbertiya xwe derketin. Bi vê çalakiyên xeta xwe ya berxwedanê derxistin pêş. Her wisa di zindanên Bakur û Tirkiyê de bi giştî 9 hevalên me bedena xwe kirin sîper û bi çalakiyên xwe yên fedaî giştin şahadetê û dawî li jiyana xwe anîn. 

" 

 

'HIKÛMETÊ LI HEMBERÎ ÇALAKIYÊ SERÎ TEWAND'

 

Yagiz, bal kişand sek helwesta hikûmeta AKP-MHP'ê ya li hemberî gireva birçîbûnê û wiha axivî: "Li hemberî çalakiyên greva birçîbûnê hikûmeta Tirkiyeyê serî tewand û bi awayekî pilankirî dest bi hevdîtinên Birêz Rêber Apo kirin. Lê dewleta ku li hemberî vê berxwedanê serî tewandî niha disan bi pilanên xwe yen qirêj dest bi tecrîdek din a girankirî a li ser Ocalan daye destpêkirin. Min ji berê de gotibû divê em ji îktîdarê bawer nekin me hîna nû destpêkiriye. Divê em bêjin berxwedan jiyane û li ser xeta berxwedanê ya ku bi fikir û felsefeya birêz Ocalan me dayî destpêkirin em bidin domandin." 

 

'HIKÛMETÊ PÊVAJO DÎSA XERA KIR' 

 

Yagiz, sekna hikûmetê ya li hemberî gelê Kurd jî rexne kir û wiha lê zêde kir: "Îktîdar a faşîst li hemberî tekoşîna gelê Kurd ne karî xwe bigire. Li gorî her pêvajoyê pilanên xwe yên qirêj derxistin holê û sozên ku ji bo pêvajoya aştiyê dabû bi cîh neanîn. Pêvajo dîsan xira kir. Tecrîd bi awayekî hîn berfirehtir da destpêkirin û operasyonek berfireh ya qirkirina gelê Kurd da destpêkirin." 

 

'EM BI REJÎMA KU QIRKIRIN KIRIYE ARMANC RE RÛ BI RÛ NE' 

 

Yagiz, destnîşan kir ku ew bi rejîma ku qirkirin kiriye armanc re rû bi rû ne û wiha domand: "Em bi rejîma qirkirinê re rû bi rû ne. Rejîma ku bi tu awayî sozên xwe bicih ne anîne, dixwazin Rêberê me wek dilgirtiyekî siyasî bigirin û di nava zindanê de tecrîd bikin. Di hilbijartinên dawî de jî diyar bû ku hewildanek ya vê qirkirinê ya destpêkirina vê operasyonê hebû." 

 

'PÊDIVÎ BI TÊKOŞÎNEK BÊ NAVBER Û BÊHEMPA HEYE' 

 

Yagiz, li ser girîngî û armanca têkoşîna gelê Kurd jî rawestiya û wiha pêde çû: "Di vê pêvajoya dema nû de divê ku parastineke li hemberî politîkayên dijmin, tekoşînek bê rawestan û bê hempa li hemberî şerê topyekûn bê meşandin. Niha dixwazin Kurdan bi destê Kurdan bidin qetilkirin û Kurdistanê tevahî dagir bikin. Divê gel li dijî ve yekê helwesta xwe nîşan bide. Siyaseta gelê Kurd ya nû wê bi serhildan û civakek demokratîk ya hêza ciwanan ya di salên borî de li bajaran dayî destpêkirin pêşbikeve. Wê bi vê berxwedana ku ji aliyê ciwanên gelê Kurd ve li her qadê tên kirin, gelê Kurd bigihêje azadiya xwe. Bê bigihêje serkeftin û mafê xwe. Ez, di aliyê siyasî de difirikim û bi awayekî aktîf vê berpirsyartiya bi sedan saline bigirim ser milê xwe. 

 

'TIFAQA AKP-MHP'Ê LI SER TUNEKIRINA GELÊ KURD HATIYE AVAKIRIN'

 

Endamê HDP'ê Nazir Yagiz, herî dawî bal kişand ser îtîfaqa AKP-MHP'ê û wiha bi dawî kir: "Ez jî wek kes, di nava tevahî mijarên ku di pêvajoyê de hene çi berpirsyartî bikeve li ser milê min ez pêk binim. Di heman demê de ez di nava wan hestên pêvajoya heyî de ku xwedî erk û berpirsyarî me dijîm. Wek Rêber Apo di hevdîtinên xwe de jî banga tifaqa yekgirtinê kiribû û gotibû: "Me ji bo çareseriyê bang li Hikûmetê kir. Lê ew di ya xwe de israr dikin. Tevî ku şereke dijwar di navbera me û artêşa Tirk de rû dide jî me eniya xwe ya heya niha parastiye. Lê ew zêdetir bi îstîxbarat û teknîkê êrîşê me dikin. AKP-MHP û Ergenekon çar sal in li dijî gelê Kurd şer dikin. Lê hîn jî bi ser neketiye. Niha Tirkiye bi hemû kesan û cîranan re pirsgirêk dijî û gelek qeyran di nava hev de dijî. Ji ber vê çend rê li pêşiya wane. Hilbijêrka yekemîn ewe guh bidin banga Rêber Apo. Eger guh bidin Rêber Apo wê ev tifaqa wan hilweşe. Tifaqa wan li ser tunekirina gelê Kurd û şer çêbûye. Eger şer raweste wê tifaq belav bibe. Ji ber vê yekê Erdogan di şer de israr dike."