COLEMÊRG – Parlamenterê HDP’ê yê Colemêrgê Saît Dede diyar kir ku mirinên li ser sînor bûye halê polîtîkaya dewletê û got: “Walî dibêje gule pekiyaye. Her çi be ev gule her tim li Kurdistanê dipekin.”
Her sal li ser xetên sînor di serî de li Colmêrgê û li gelek bajaran eskerên Tirkiyeyê û Îranê gule direşînin welatiyan û jiyana xwe ji dest didin. Di hefteyek dawî de Vedat Ekîncî li ser sînorê navçeya Rûbaroka Colemêrgê ji aliyê eskerên tirk ve û Haşam Tîlaver jî li ser sînorê Bazîdê ji aliyê pasdarên Îranê ve hatin kuştin. Parlamenterê HDP’ê yê Colemêrgê Saît Dede mirinên li ser sînor nirxand.
'BI DESTÊ DEWLETÊ LI SER SÎNOR ÊŞ DIEQEWIMIN'
Dede da zanîn ku hemû cih û warên her du aliyên sînoran ku însan lê dijîn hemû xizmên hev in û ev însan van sînoran wek “sînorên sunî” dibîne. Dede anî ziman ku li ser sînor bi destê dewletê mirinên dilşewat pêk tên û got: “Em ji van mirinan re dibin şahid. Bûyera Vedat Ekîncî ya li Rûbarokê pêk hat polîtîkaya dewletê ya ku her baş vedibêje ye. Însanên li her gundên Rûbarokê bi însanên gundên li Herêma Federa ya Kurdistanê re xizmên hev in. Di nava têkiliyên bazirganiya sînor de ne. Zarokên hin malbatan li vî alî ne hin zarokên wan jî li wî alî ne. Ji ber vê yekê sînorên heyî sînorên çêkirî yên xistine navbera biratiya kurdan. Tu demê wateya van sînoran ji bo xelkên me yên li ser sînor tune ne.”
‘TIŞTÊN DIQEWIMIN POLÎTÎKAYA DEWLETÊ DIDE NÎŞANDAN'
Dede destnîşan kir ku bi taybetî di nava 4 salên dawî de dewlet li hember însanên herêmê polîtîkayek şer birêve dibe û wiha got: “Dewlet di polîtîkaya xwe ya çar salan de dixwaze Kurdistanê vala bike, tune bike û dîsa dixwaze mêtingeriyê dubare bike. Dixwaze kurdan tune bihesibîne. Meseleya li vir şerkirina birêxistinikê re nîne. Me vê li Rojava dît. Me viya li Başûr dît. Em viya li Bakur jî dibînin. Dewlet bi her rêbazê bi ser kurdan de tê û ev hatina bi ser kurdan ve didome. Vê yekê di warê siyasî, civakî û aborî de jî dike. Li ser herêmên sînor herî zêde di qada aborî de vê yekê kir. Gund û zozan hatine qedexekirin. Ev têr nekir, li serê hemû giran qereqol hatine çêkirin. Ji ber vê yekê însanên li van herêman nikarin gav biavêjin. Însan êdî ji bo aboriyê tiştek nabîne û neçare bazirganiya sînor bike. Li dijî kesên bazirganiyê dikin jî polîtîkaya mirinê pêk tîne. Di esasê xwe de pêkanînên li ser sînor polîtîkayek dewletê û biryarek siyasî ye. Tiştên diqewimin em nikarin bûyerek bi serê xwe ye bibînin.”
'HER ÇI BE EV GULE HER TIM LI KURDISTANÊ DIPEKIN'
Dede diyar kir ku li herêmê her tim ev bazirgan diçin û tên û li gorî agahiyên malbata Vedat Ekîncî wergirtine beriya niha jî bûyerên bêtir xeternak qewimîne û wiha domand: “Bûyera Vedat Ekîncî ro li nîvro pêk hatiye. Esker dizanin sivîl di wir de diçin û tên. Tevgerek hewayî nîne. Di mesafeyek nêz de gule lê reşandine Vedat û wî dikujin. Heman bûyer li ser sînorê Îranê jî pêk tên. Beriya çend rojan ciwanek me din jî li Bazîdê ji aliyê pasdarên Îranê ve hat qetilkirin. Waliyê Colemêrgê Îdrîs Akbiyik malbata Vedat Ekîncî ziyaret kir. Walî dibêje ‘Bêguman ev hinek jî qedera erdnîgarî ye. Mixabin bûyerên wiha xemgîn jî li ser vê erdnîgariyê pêk tên.’ Ev daxuyanî sosret e. Walî dîsa dibêje ‘gule pekiyaye.’ Li ku pekiya ku gule li pişta birayê me ketiye û di sînga wî de derketiye. Qet nebe jê re kirasek ku mirovan qanih bike bibînin. Lê nikarin kiras jê re bibînin. Em vê ji Roboskî, 33 Gule, Sertîp Şen ê li Geverê hat kuştin dizanin. Heke vê dewletê hesabê Roboskî bipirsiya dê şivanêl i Geverê nehata kuştin. Heke hesabê Geverê bihata pirsîn dê îro Vedat Ekîncî li jiyanê bûya. Di esasê xwe de dewlet bi vê hêza xwe ya ewlehiyê dibêje ‘hûn dikarin kurdan bikujin.’ Her çi be ev gule her tim li Kurdistanê dipekin û ev bûyer li welatê me diqewimin.”
MA / Hamza Gunduz