Hevseroka Kongreya Civaka Demokratîk (KCD) û Parlamentera Partiya Demokratîk a Gelan (HDP) a Colemêrgê Leyla Guven 135 roj in li dijî tecrîdkirina Rêberê PKK’ê Abdullah Ocalan di greva birçîbûnê ya bêdawî û bêdorveger de ye. Guven di 8’ê mijdara 2018’an de li Girtîgeha Tîpa E ya Amedê dest bi greva birçîbûnê kir û di 25’ê çile de hat berdan û ji wê rojê ve jî li mala xwe ya li Amedê çalakiya xwe didomîne. 

 

Çalakiya Endamê HDP'ê Nasir Yagiz ê li Hewlerê bi heman armancê 122 rojin didome. Çalakiya 14 çalakgerên li Strasbuorg û ya Îmam Şîş a li Gallerê jî 96 roj, çalakiya koma ewil a girtiyan ku di 16'ê Kanûnê de li girtîgehan dest pê kir 97 roj in didome. Di 1'ê Adarê de jî li tevahiya girtîgehan girtiyên PKK'ê û PAJK'ê dest bi greva birçîbûnê ya bêdawî û bêdorveger kirin di roja 22'emîn de berdewam dike. 

 

Di 3'ê Adarê de jî parlamentera HDP'ê ya Amedê Dersîm Dag û endamên HDP'ê Salîh Cansever, Îsmet Yildiz, Sevîcan Yaşar, Salîh Tekîn û Bîlal Ozgezer bi heman armancê li avahiya Rêxistina HDP'ê ya Amedê ketin greva bêdem û bêdorveger. Di 8'ê Adarê de parlamenterê HDP'ê Tayip Temel û Murat Sarisaç û 2 welatiyên din jî tev li çalakiya Dersîm Dag û 5 endamên HDP’ê bûn.

ÇALAKIYA GUVEN BÛ STRAN Û AWAZ

Ji roja çalakiya greva birçîbûnê ya bi pêşengiya Guven hat destpêkirin şûn ve gelek stran û helbestên armanc û daxwaza çalakiyê tînin ziman hatin nivîsandin. Gelek hunermendan bi stran û newayên xwe bal dikişînin ser greva birçîbûnê.

‘LEYLA BÛYE BÛK E’ 

 

Rojnameger-nivîskar Îkram Balekanî stranek bi navê “Leyla” nivîsand û bal kişand ser çalakiya greva birçîbûnê ya Leyla Guven û çalakgerên din. Strana ku gotin û muzîka wê Balekanî çekiriye, aranjeya wê jî Memo Gul çêkiriye. Strana hat amadekirin ji aliyê Balekanî ve li ser YouTube hat parvekirin. Balekanî di klîba xwe de wiha dibêje: “Diyarî ji bo Leyla Guven û hemû berxwedêran...” 

 

Di klîbê de wêneyên Guven û çalakgerên din û her wiha wêneyên pêşengên têkoşîna kurdan hatine bicihkirin.

 

Gotinên strana “Leyla” wiha ne:

 

“LEYLA

 

Keçek derket ji Anatolya Navîn berê xwe da Kurdistanê

 

Digot min sond xwariye bi Qazî Mihemd, Seyîd Riza bi Şêx Seîd û hemû şehîdên li Pîranê

 

Bi Kemal Pîr, Xeyrî Durmuş bi şehîdên Cizîra Botan bi hemû şehîdên berxwedanê

Em venagerin ji vê dozê, ev e doza Kurdistanê...

 

Kurdistan pir mezin e

Kes nebêje biçûk e

Ji Efrinê ta Kerkûkê

Tev kolan sûk bi sûk e

Xeber dane Amedê

Dibêjin Leyla bûk e

Strasbourg û Hewlêr

Jê re bûne berbûk e

 

Dîlan dîlan dîlan e

Li her derê berxwedan e

Leyla keça kurdan e

Hevrê ya Ocalan e

Keç û xortên welat

Zend û bend badane

Daxwaziya wan Kurdistan

Azadiya Ocalan e

 

Nebêj zû ye dereng e

Ev ne henek e ceng e

Ji zîndanan dest pê kir

Li cîhanê da deng e

Sira azadiyê ceng e

Berxwedan reng bi reng e

Wê Kurdistan azad be

Tev bijîn hemû renge”

 

Stran li ser vê lînkê tê temaşekirin: https://www.youtube.com/watch?v=LcN1vZWJ0WQ

 

MA / Bîlal Guldem