Yek ji navçeyên Mêrdînê ya herî mezin Qoser e. Ji 250 hezarî zêdetir nifûsa wê heye. Partiya Demokratîk a Gelan (HDP) li Qoserê bi namzetên hevşaredariyê Nilufer Elîk Yilmaz û Salîh Kuday xwe ji bo hilbijartina herêmî ya 31’ê Adarê amade dikin. Ji 2016’an ve qeyûm şaredariya Qoserê birêve dibe. Namzetên Hevşaredariyê Yilmaz û Kuday xwe amade dikin ku îradeya gelê xwe ji qeyûm bistînin. 

 

Yilmaz û Kuday ên ku xwe ji bo rêjeyek bilind a hilbijartinê amade dikin ji ajansa me Mezopotamyayê re axivîn. 

 

JIYANEK DI NAVBERA SIRGÛN Û GIRTÎGEHÊ DE 

 

Salîh Kuday di sala 1966’an de li Qoserê hat dinê. Kuday Beşa Civaknasiyê ya Fakûlteya Fen Edebiyat a Zanîngeha Firatê xwend. Di sala 1994’an de li Qoserê salek mamostetî kir û pişt re wî sirgûnî Çaykara Trabzonê kirin. 2 sal li Trabzonê karmendiyê kir. Pişt re vegeriya Qoserê û di şaxên Egîtîm Senê yên Qoser û Mêrdînê de wezîfeyên cuda kir. Kuday bi hêceta beşdarî cenazeyê Ugur Kaymaz bû doz lê hat vekirin û di 2010’an de hat girtin. Li ser îtîrazê hat berdan. Piştî girtîgehê mamostetiya Kuday “guncav” nehat dîtin û wî dîsa sirgûnî Trabzonê kirin. Kuday neçû sirgûnê û dest ji mamostetiyê berda. 

 

Kuday demek li Miduriyeta Karê Civakî û Çandê ya Şaredariya Qoserê xebitî û piştî qeyûm hat tayînkirin bi KHK’ê hat îxrackirin. Kuday piştî hat îxrackirin hat girtin û piştî demek şûn ve hat berdan û di nav xebatên siyasî de cih girt. 

 

'PROJEYA ME MEZIN EM Ê VÎNA GEL RADEST BIKIN’ 

 

Kuday destnîşan kir ku zext û zordariya li ser wan dê negihîje armanca xwe û got: “Bi qeyûman dixwazin çandek pişaftinê bînin li şûna çanda gelê kurd bicih bikin. Tehamûlî peykerê zarokek 12 salî jî nekirin. Lê wê tu hêz nikaribe gelê kurd ji çanda wan dûr bike. Hilbijartin ji bo gelê navçeyê mîlad e. Sedemek sereke ya vê mîladê îpotekirina îradeya gel e. Em ê jî vê vîna gel carek din radestî wan bikin. Projeya me ya herî mezin a heta 31’ê Adarê ew e ku vîna xwe paş de bistînin.” 

 

DIXWAZE WEZÎFEYA BAVÊ XWE DEWAM BIKE 

 

Namzeta Hevşaredariyê Nilufer Elîk Yilmaz jî di sala 1962’an de li gundê Qurdîsê ya girêdayî navçeya Artuku ya Mêrdînê hat dinê. Elîk Yilmaz keça Şaredar Mehmet Elîk yê di hilbijartina 1978’an de hat bijartin û di darbeya 1980’yî ya eskerî de hat girtinê ye. Elîk bi bavê xwe re rastî îşkenceyên giran hat. Elîk ji ber sedemên aborî û siyasî neçar ma dest ji dibistanê berde. Elîk Yilmaz ji şaredariyê hat îxrackirin. Elîk demek dirêj di nava xebatên jinan de cih girt û niha jî dixwaze peywîra bavê xwe di bin sîwana HDP’ê de birêve bibe. 

 

ELÎK: CARA DUYEM UGUR QETIL KIRIN 

 

Elîk anî ziman ku bi tayînkirina qeyûm re ewil saziya jinan û ciwanan hedef hatin girtin û wiha got: “Bi êrîşek faşîzane peykerê Ugur Kaymaz hilweşandin. Peykerê Ugur remza Qoserê bû. Cara duyem Ugur qetil kirin. Navê kolana Musa Anter û Qada Azadiyê guhertin. Şaredarî veguherandin qereqolê. Qeyûman xwest vîna gel xelas bikin û bişkênin. Gel ji van pêkanîn pir aciz e. Dibe niha bêdengî hebe, lê dê di 31’ê Adarê de bi hêzek mezin vîna gel biser bikeve.” 

 

‘SERDEMEK JI YA KENAN EVREN WÊDETIR HEYE’ 

 

Elîk serdema bavê wê ji şaredariyê hat girtin û pêkanîna qeyûm dişibin hev û wiha dewam kir: “Îro serdema Kenan Evren jî derbas kiriye. Wê demê hemû şaredarên welatparêz ji wezîfeyê digirtin. Niha jî serdemek bêtir kûr û têkbirinê heye. Lê gel ji van pêvajoyan re ne xerîb e. Ji ber vê yekê ez namzetiya xwe girîng dibînim. Em ê di 31’ê Adarê de em hin bêtir nirxên xwe paş de bistînin. Dixwazin têgeha HDP bi ser bikeve jî dê dîsa qeyûm tayîn bikin pêk bînin. Lê ji bo saetekê be jî em ê bi gelê xwe re vê şaredariyê bistînin dîsa. Em ê her tim li cem gelê xwe bin.” 

 

MA / Ahmet Kanbal