Li Şengalê dema Cejna Cimayiyê ye. Ev meheke ku hem li başûrê Çiyayê Şengalê hem li bakurê Çiyayê Şengalê pîrozkirina cimayiyan dest pê kiriye û cimayî dibin nîşaneya vegera gel a Şengalê. Her wiha hezkirin û girêdana civaka Êzidî ya bi çand, bîr, bawerî û axa xwe ve ye.

 

Cejna Cimayiyê ku du rojan berdewam dikin, ji duh ve li komelgeha Zorava Cimayiya Pîrê Ewra, li komelgeha Borikê Cimayiya Şêşims û Şêx Berekat, li Kolika Cimayiya Serêkanî û li navenda Şengalê jî Cimayiya Mehme Reşan têne pîroz kirin.

 

Di roja yekemîn a cimayiyê de anku duh, amadekariya cejnê hate kirin, govend hate gerandin û civaka Êzidî xêr belav kir.

 

Îro jî bi amadebûna feqîrên bi xirqe, qewlbêj, çilegir û rûsipiyan reûresmên olî pêk hatin û perî hatin siwarkirin. Piştî reûresmên olî bi hezaran Êzidiyan govend gerandin. Wê li Şengalê pîrozkirina Cejna Cimayiyê di hefteyên pêş de jî berdewam bikin.