ŞIRNEX - Di ser kuştina 137 kesên li Cizîrê di dema derketina qedexeya derveye de li jêrzemînên malên xwe asê man û hatin kuştin de, 3 sal derbas bûn. Wê DMME, di salvegera bûyerê de biryara xwe aşakere bike.
Li navçeya Cizîr a Şirnexê, di 14'ê Kanûna 2015'an de qedexeya derketina derve hatibû îlankirin û 79 roja dewam kiribû. Di dema qedexeyê de 137 kes di jêrzemînên 3 avahiyan de asê mabûn û hatibûn şewitandin. Di ser bûyerê re 3 sal derbas bûn, lê ne şêniyên navçeyê ne jî xizmên kesên jiyana xwe ji dest dan ev bûyera ku Komîsertiya Bilind a Mafê Mirovan a Neteweyên Yekbûyî (NY) ji bo wê gotibû "dîmeneke wekî qiyametê", ji bîr kirine.
HÎN JÎ HIN CENAZE WINDA NE
Di jêrzemîna yekemîn 31, di ya duyemîn de 62 û di ya sêyemîn de jî 44 kesan jiyana xwe ji dest dan. Di nav kesên jiyana xwe ji dest dan Hevserokên Meclîsa Gel a Cizîrê Mehmet Tûnç û Asya Yuksel, rojnamevan Rohat Aktaş, endamên Meclîsa Partiyê ya DBP'ê, hunermendên NÇM'ê, endamên KJA'yê û gelek xwendekar û zarok hebûn.
Li van jêrzemînên ku bi gotinên "Me çok danenî. Bila yên mayî bi me serbilind bin" ên Hevserokê Meclîsa Gel a Cizîrê Mehmet Tûnç, tê bîra mirovan hîn jî cenazeyên hin kesên jiyana xwe winda kirin nehatine dîtin.
LI SER JÊRZEMÎNAN TOKÎ HATIN ÇÊKIRIN
Piştî bûyerê, avahî hatin rûxandin û şûna wan bi molozan hat dagirtin û paşê li ser wan dest bi çêkirina avahiyên TOKÎ'yê hat kirin. Hîn jî derdora vê qadê bi bariyeran dorrpêç kiriye û tê gotin hîn jî cenaze di wir de hene.
Der barê kesên hatin kuştin de lêpirsîn hatin destpêkirin, lê belê der barê piraniya van lêpirsînan de biryara "neşopandinê" hat dayîn û mirin wekî "li gorî hiqûqê" hatin qebûlkirin.
WÊ DMME, DI SALVEGERA BÛYERÊ DE BIRYARA XWE AŞKERE BIKE
Her wiha, li ser navê Omer Elçî û Orhan Tûnç serî li Dadgeha Mafên Mirovan a Ewropayê (DMME) hat dayîn. DMME'yê serlêdana ji bo Orhan Tûnç qebûl kir û danişîna serlêdanê di 13'ê Mijdara 2018'an de pêk hat. Parêzerên dosyeyê, daxuyandin ku wê DMME di salvegera jêrzemînan yanî di 7'ê Sibatê de biryara xwe aşkere bike.
'BILA ÊDÎ KES NEMIRE'
Yek ji kesên di jêrzemîna yekemîn de hat kuştin jî Ramazan Îşçî yê 16 salî bû. Dayika wî Hatîce Îşçî ku got "ên ev êş nekişandibin nizanin", îşaret bi wê serdemê kir û got: "Em ji televîyonê hîn bûn ku kurê min di jêrzemînê de ye. Piştî ji bo erzaq bikire derket derve, hew hayê me jê çêbû. Ji bo em wî xelas bikin em derketin, lê belê polîsan destûr neda."
Dayik Îşçî ku got "heta em sax bin em ê zarokên xwe ji bîr nekin", xwest kiryar bên darizandin û êdî kes nemire. Dayik Îşçî got: "Em aştî û azadiyê dixwazin. Bila êdî xwîn neherike."