RIHA - Bêrîvan Karakeçîlî ya 13 salî li gel malbatê çû li Antalyayê bixebite. Lê Berîvan Karakeçîlî, li kar jiyana xwe ji dest da û cenazeyê wê anîn Wêranşara Rihayê. Bav Kazim Karakeçîlî, “Patronan got baran jî bibare û kevir jî bibare hûn dê bixebitin. Em bi zorê dan xebitandin. Patronên ku bi zorê em dan xebitandin berpirsiyarê mirina keça min in.
Li navçeya Kumluca ya Antalyayê di 24'ê çile de li nava zeviyê babelîsk derket di firtoneyê de saça xanî bi ser serê Berivan Karakeçilî ya 13 salî de ket û jiyana xwe ji dest da. Piştî Berîvan jiyana xwe ji dest da, cenazeyê wê anîn navçeya Wêranşarê ya Rihayê. Ziyaretên sersaxiyê ya ji bo Bêrîvan Karakeçîlî didomin. Malbata Karakeçilî ji ber rewşa xizan, ji bo xebatê bikin di meha Îlonê de çûn Antalya û keça xwe jî ji Îlonê de li gel wan dixebitî. Bav Kezim Karakeçilî, diyar kir ku ji meha ÎLonê de li navçeya Kumluca kar dikin û wiha got: "Dema hewa nexweş be em naxwazin kar bikin. Lê xwediyê baxçeyên porteqalan û xwediyê fabrîqeyên porteqalan destûr nade ku em di şertên xerab de li malê bimînin."
'EZÊ HETA DAWÎ LI MAFÊ KEÇA XWE BIGERIM'
Bav, Karakeçilî, diyar kir ku ew dê heta dawî li mafê keça xwe bigere û wiha got: "Ez ji xwediyê fabrîqeyên porteqalan bi gilî me. Roja babelîsk(babîsok) derket, karkeran nexwest dakevin nava baxçe û xwestin wê rojê li malê bin. Lê patron got "Baran jî bibare û kevir jî bibare hûn dê bixebitin. Dema balelîsk rabû, her kes reviyan, lê ew zarok bû, li şûna bireve li babeliskê nerî. Kesî jî alîkariya wê nekir. Li nava baxçe rûniştibû. Di wê kêliyê de saça ku babelîskê ji ser barî firant li serê wê ket. Bi darbeya sacê keça min jiyana xwe ji dest da."
JI BER REWŞA ABORÎ EM NAÇAR ÇÛN KAR
Karakeçilî, destnîşan kir ku ji ber rewşa aborî ji neçarî çûn kar û wiha bi dawî kir: "Ger ku rewşa meya aborî baş bûya em nediçûn kar. Em li baraqeyan diman. Ne xanî bû û ne jî kon bû. Bareqeya ser wê sac bû. Hemû zarokên min biçûk in. Tenê Berîvan li gel me dixebitî. Wê jî dibistan dixwend. Lê me nexwest wê tenê li malê bihêlin. Me ew jî bi xwe re anî. Bêrîvan kar dikir. Xwezî hêza min a aborî hebûya û min keça xwe neanîya kar. Xwediyên fabrîqeyan her dem gefên ku me ji kar bavêjin li me dixwar. Dema ba, bahoz û firtone hebûya û me nedixwest em kar bikin, qebûl nedikir. Digot baran jî û ba be jî hûn dê bixebitin. Bahoz rabû û keça min jiyana xwe ji dest da. Ji bo me ji kar bavêjin her tişt dikir hincet. Dema nedihat hesabê wan em ji kar davêtin."