WAN - Namzetên Hevşaredariyê yên Şaredariya Mezin a Wanê Bedîa Ozgokçe Ertan û Mûstafa Avci, diyar kirin ku ew ê şaredariyên bajêr hemûyan bi dest bixin û ew ê dawî li polîtîkaya qeyûman bînin. Namzetan diyar kir ku ew ê ewil avahiyên şaredariyên yên veguherîne qereqolan ji bo gel vebikin.
Partiya Gelan a Demokratîk (HDP), namzetên xwe yên ji bo hilbijartina herêmî ya 31'ê Adarê diyar kirin. Namzetên Şaredariya Mezin a Wanê Bedîa Ozgokçe Ertan û Mûstafa Avci ne. Herdu namzetan destnîşan kirin ku ew ê şaredariyên li bajêr hemûyan bi dest bixin.
'QEYÛMAN XWEST BÎRA CIVAKÊ TUNE BIKIN'
Bedîa Ozgokçe Ertan, destnîşan kir ku ev hilbijartin ji bo wan pir girîng e û tayînkirina qeyûman bi bîr xist. Ozgokçe got: "Feraseta rêveberiya herêmî xwe dispêre ferseta rêveberiya gel. Di dîroka komarê de u hikûmet wekî me nêzî rêveberiyên herêmî nebûne. Çimkî derd û xema wan cuda ye. 90 sal in ew bi feraseta asîmlasiyonê tev digerin. Tayînkirina qeyûman jî ev feraset bi xwe ye. Bi polîtîkayeke ku gelê kurd nayê hesibandin qeyûm hatin tayînkirin. Ji ber vê vîna me hatiye xespkirin. Ji me re hat gotin 'mafê we yê hilbijartinê tune ye.' Gelê kurd jî vê yekê dibîne û li gor wê tev digere. Hemû hêrs û kîna gel li dijî qeyûman e. Qeyûman ewilî berê xwe dan bîra civakiyî. Tabeleyan bi kurdî daxistin, navendên çandê girtin, navên parkan guherandin. Peykerê Ehmedê Xanî şikandin. Xwestin navendên me yên bîr/hafizeyê tune bikin. Polîtîkaya qeyûman ev e û ji roja hatine hemû pereyên aîdî geş tarûmar kirine."
'TAYÎNKIRINA QEYÛMAN HEQARET E'
Ozgokçe, diyar kir ku piştî ew bên hilbijartinê wê karê wan ê ewil texrîbata li şaredariyê rû daye ji gel re vebêjin û got: "Herkesî bi KHK'yan îxrac kirin an jî ji kar avêtin. Tenê ne avêtina ji kar, bi navê xizmetê tu tişt jî nekirine. Gel baş hay ji vê yekê heye ûd ibîne. Ji bo karekî biçûçik an jî rêyekê gelek caran îhaleyan çêdikin û pêşkesî alîgirên xwe dikin. Jixwe ev yek di raporê Dîwana Muhasebatê de derketin holê bê çi nelirêtî hatine kirin. Em dizanin qeyûman xizmeta vî gelî nekiriye. Gel kêmxistin e, tune hesibandine. Hevşaredarê Şaredariya Mezin ê Wanê Bekir Kaya ji ber rê çêkir hat girtinç Xizmetên Kaya 'Di çarçoveya têkoşîna li dijî terorê de' hatin nirxandin. Tiştekî wis ane mumkun e. Rêveberên me yên ji aliyê gel hatin hilbijartin xesp kirin. Polîtîkaya qeyûman ji bo me, ji bo gelê kurd birîneke mezin e. Heqareteke mezin e."
'EM Ê BI SER BIKEVIN'
Ozgokçe, destnîşan kir ku armanca wan ew e ku li bajêr her 14 şaredariyan jî bi dest bixin. Ozgokçe, bilêv kir ku ev hilbijartin ji bo gel wekî hilbijartina rovanşê ye û bi hêviyeke mezin li benda roja hiilbijartinê ye. Ozgokçe, destnîşan kir ku ew bawer dikin ku ew ê di vê hilbijartinê de bi ser biekvin û ev yek di heman katê de wekî referandûmê ye. Ozgokçe, destnîşan kir ku wê HDP di vê hilbijartinê de bi ser bikeve û got: "Perspektîfa me perspektîfeke demokratîk, ekolojîk, azadiya jinê û wekheviyê ye. Ev wekî gotin tenê di tuzuka me de cih nagirin, her diçe pêk tên û pratîka wan çêdibe. Niha pergala hevserokatiyê li tevahiya cîhanê balê dikişîne. Ev model ji aliyê HDP'ê vê bûye malê cîhanê." Ozgokçe, diyar kir ku ew ê rê nedin feraseta ku rê li ber detskeftiyên jinan digire û ew ê ji cihê mayî dewam bikin.
'KARÊ ME YÊ EWIL; EM Ê ŞAREDARIYÊ JI GEL RE VEBIIKIN'
Namzet Mûstafa Avci jî, destnîşan kir ku feraeta qeyûman berhema îktîdarê ye û polîtîkayeke li dijî kurda ye. Avci, bilêv kir ku ew ê li dijî vê ferasetê bitêkoşin û ew ê di 31'ê Adarê de şaredariyan radestî gel bikin. Avci got: "Serketin bi tenê têr nake, em ê ava jî bikin. Pratîka me heye. Ev çend sal e di rêveberiya herêmî de em xwedî tecrûbe ne. Ev tecrûbe hêzê didin me. Ji berê heta niha kedeke komunal li holê heye. Em ê vê yekê dewr bigirin û çi kêmasî hebin temam bikin. Beriya her tiştî em ê avahiyên şaredariyê yên hatine xespkirin û veguherîne qereqolan veguherînin. Em ê ji bo xizmetê ji gelê xwe re vebikin."
Avci, diyar kir ku wexta ew şi navenda bajêr digerin ji sedî 80'yê bajêr bertekên erênî nîşan didine û got: "Gel bêriya şaredariyên xwe dike. Em bibin bersiva vê bêrîkirinê. Projeya HDP'ê projeyeke civakiyî ye. Em tenê ne partiyeke siyasî ne û karê me tenê ne hilbijartin in. Projeya HDP'ê projeya pêşerojê ye û projeya hêviyê ye. Ê ku hay ji vê projeyê çêdibe li kuderê dibe bila bibe bi sempatî nêz dibe. Em ê di vê pêvajoya hilbijartinê de hemû qirêjiyên qeyûman deşîfre bikin û wê hesab bibin. Em wan mehkûm bikin. Di vê pêvajoyê de heta ji destê me bê em ê bernameya HDP'ê ya cihê hêviyê ye pêk bînin û wê bi rêxistin bikin. Xema me tenê ne sindoq in. Helbet ev jî girîng e, lê me di 2014'an de şaredarî bi kîjan rêjeyê bi dest xistibe armanca me ya niha ew e ku em ji wê rêjêyê zêdetir deng bigirin. Astengî çi dibin bila bibin, em ê rêxistinbûyîna rûbirû esas bigirin û gund bi gund, tax bi tax bigerin û vê projeyê vebêjin."
'EM Ê HERKESÎ DAXILÎ PÊVAJOYÊ BIKIN'
Her wiha Avci, bal kişand ser pergala hevserokatiyê jî û got: "Em ê hewl bidin ku kêmasiyên di vî warî de jî temam bikin. Em mecbûr in hin tiştan ji kirasê dirûşmeyan derxînin. Jixwe li holê ye ka bê feraseta şaredarîvaniya klasîk civak ber bi ku ve biriye. Ji bo şaredariyan em feraseteke me heye; ekolojî, demokrasî, wekhevî, azadî. Ev tişt di warê teoriyê de pir xweş in, lê ji berê heta niha keda hevalên me jî kedeke pir mezin e. Ligel her tiştî, ligel hemû tengasiyan jî hewl dan. Lê belê miheqeq hin xal hene divê meriv xwe rexne bike. Em ê di vî warî de xwe rexne bikin. Em wekî sazî behsa xwerexnekirinê dikin. Di vê çarçoveyê de em soz didin gelê xwe ku em ê kêmasiyên xwe temam bikin." Avci, diyar kir ku divê civak daxilî vê pêvajoyê bibe û got: "Eger mirov nikaribe civakê daxil bike nexwe mirov nikare behsa xwerêveberiyê jî bike. Ew çax wê tu ferqa ya heyî û ya klasîk ji hev tune be. Divê em bin vê yekê xêz bikin. Em ê tevî gel vê pêvajoyê bi rê ve bibin. Eger em behsa xwerêveberiyê bikin nexwe divê gel jî daxilî pêvajoyê bibbe. Tenê ne beşdarbûyîna fikrî, beşdarbûyîneke di her warî de."
Avci, destnîşan kir ku ew ê herkesî daxilî vê pêvajoyê bikin û ew ê bi ser bikevin.
MA / Adnan Bilen – Mujdat Can